वीरको न्यूरो सर्जरी विभाग प्रमुख डा.झालाई ‘नेपाल विद्याभूषण पदक क’

हेल्थ टुडे,
काठमाडौं, २ असोज : वीर अस्पतालका न्यूरो सर्जरी विभाग प्रमुख डा.राजिव झालाई नेपाल सरकारले ‘नेपाल विद्याभूषण पदक क’ बाट विभुषित गरेको छ । राष्ट्रिय शिक्षा दिवस २०८० को अवसरमा मंगलबार नेपाल सरकारले डा.झालाई ‘नेपाल विद्याभूषण पदक क’ बाट विभुषित गरेको जनाएको छ । चिकित्सा विज्ञान राष्ट्रिय प्रतिष्ठान वीर अस्पताल (न्याम्स) बाट डा.झाले न्यूरो सर्जरी विषयमा विद्यावारिधि गरेका छन । सरकारले निकट भविश्यकै डा.झा सहित नेपाल विद्याभूषण प्राप्त गरेका व्यक्तित्वहरुलाई एक समारोहमा विभूषित गर्ने जनाएको छ । विभूषित हुनेहरुको नाम आज सार्वजनिक गरेको हो । विसं २०२८ सालमा महोत्तरीको जलेश्वरमा जन्मिएका डा.झाले रसियाबाट एमविविएस र एमडीसम्मको अध्ययन गरेका छन् । उनी बिगत दुई दशकदेखि वीर अस्पतालमा कार्यरत छन् । डा.झाले गत वर्ष मात्र बेलायतको विख्यात ‘फेलो अफ रोयल कलेज अफ सर्जन्स’ पुरस्कार प्राप्त गरेका थिए । यो पुरस्कार विश्वका प्रख्यात न्युरोसर्जनहरूलाई प्रदान गरिँदै आएको छ ।
बेलायतको द रोयल कलेज अफ सर्जियन अफ एडनबर्गले शल्य चिकित्साको क्षेत्रमा महत्वपूर्ण योगदान पु¥याउने व्यक्तिलाई हरेक वर्ष यो अवार्ड प्रदान गर्ने गरेको छ । यो सम्मानबाट सम्मानित हुने डा. झा नेपालका दोस्रो चिकित्सक हुन् । यसअघि उक्त सम्मान न्युरोसर्जन डा. उपेन्द्र देवकोटालाई प्रदान गरिएको थियो ।
यसै गरि गत वर्ष नै डा. झालाई नेपाल सरकारले ‘राष्ट्रिय विज्ञान, प्रविधि तथा नव प्रवर्तन पुरस्कार २०७९’ बाट पुरस्कृत गरेको थियो । त्यसका साथै गत वर्ष राष्ट्रपतिबाट प्रदान गरिने सुप्रबल जनसेवाश्री पदकद्वारा समेत डा. झालाई विभूषित हुने अवसर प्राप्त भएको थियो । उनलाई राष्ट्रपति रामचन्द्र पौडेलले विभूषित गरेका थिए ।