हेल्थ टुडे,
काठमाडौं, १ भाद्र : स्थानीय तहको निर्वाचन आउन करिब नौ महिना बाँकी रहँदा स्वास्थ्य तथा खाद्य स्वच्छतामन्त्री निशा मेहताले निर्वाचन लक्षित राजनीतिक गतिविधि सुरु गरेकी छन्। सरकारी कामको सिलसिलामा तराई–मधेसका जिल्लामा पुगिरहेकी मन्त्री मेहताले स्थानीयसँगको भेटमा राष्ट्रिय स्वतन्त्र पार्टी (रास्वपा) का पक्षमा मत माग्न थालेकी हुन्।
३० साउनमा सिरहामा स्थानीयसँगको भेटमा मन्त्री मेहताले संघमा मात्रै रास्वपाको सरकार हुँदा काम गर्न असहज भएको भन्दै प्रदेश र स्थानीय तहमा पनि रास्वपाको सरकार आवश्यक रहेको बताइन्। उनले आगामी स्थानीय तहको निर्वाचनमा रास्वपाका उम्मेदवारलाई जिताउन स्थानीयसँग आग्रहसमेत गरिन्। ‘तपाईंहरू युवाहरू सबै मिलेर जसरी संघमा जिताउनुभयो, त्यसैगरी हजुरहरूले अझ एकचोटि मेहनत गर्नुप¥यो,’ उनले भनिन्, ‘लोकल र प्रदेशमा पनि हाम्रै सरकार चाहियो।’
स्थानीय तहको निर्वाचन आउन अब धेरै समय नरहेको उल्लेख गर्दै उनले मतदातालाई अहिलेदेखि नै रास्वपाको पक्षमा उभिन आग्रह गरेकी हुन्। ‘कति छ समय अब ? ६ महिना, ९ महिना जति त छ नि,’ उनले भनेकी छन्।
यसअघि २०७९ वैशाखमा स्थानीय तहको निर्वाचन भएको थियो। उक्त निर्वाचनबाट निर्वाचित स्थानीय जनप्रतिनिधिको कार्यकाल आगामी वैशाखमा सकिँदैछ। निर्वाचनको मिति औपचारिक रूपमा घोषणा नभइसके पनि मन्त्री मेहताको पछिल्लो अभिव्यक्तिले रास्वपा स्थानीय तह निर्वाचन केन्द्रित गतिविधिमा समयअगावै सक्रिय भएको देखाएको छ।
मन्त्री मेहता सरकारी जिम्मेवारीअन्तर्गत अस्पताल अनुगमन तथा अन्य स्वास्थ्यसम्बन्धी कार्यक्रममा सहभागी हुन विभिन्न जिल्लामा पुग्ने क्रममा स्थानीयसँग भेटघाट गरिरहेकी छन्। त्यस्ता सरकारी भ्रमणकै क्रममा पार्टीका लागि मत मागिएको भन्दै उनको गतिविधिमाथि सरकारी स्रोत–साधनको सम्भावित दुरुपयोग भएको प्रश्नसमेत उठेको छ। सरकारी पदमा रहेका मन्त्रीले सरकारी भ्रमण, सवारीसाधन तथा अन्य सार्वजनिक स्रोत–साधन प्रयोग गरेर कुनै राजनीतिक दल वा उम्मेदवारको पक्षमा निर्वाचन प्रचार गरेमा त्यसले निर्वाचन आचारसंहिताको प्रश्न उठाउन सक्छ। तर, मन्त्री मेहताको पछिल्लो गतिविधि आचारसंहिता उल्लंघन हो वा होइन भन्ने विषयमा सम्बन्धित भ्रमणमा सरकारी स्रोत–साधनको प्रयोगको प्रकृति र निर्वाचन आयोगको औपचारिक धारणा आवश्यक हुन्छ।
निर्वाचन आयोगले सामान्यतः निर्वाचनको मिति घोषणा भएपछि औपचारिक निर्वाचन प्रक्रिया तथा आचारसंहिता कार्यान्वयनलाई अघि बढाउँछ। त्यसअघि पनि निर्वाचनको तयारीका क्रममा आयोगले आफ्नो व्यवस्थापकीय क्षमता अभिवृद्धि तथा आवश्यक आन्तरिक कामहरू अघि बढाउँदै आएको हुन्छ।
स्थानीय तहको निर्वाचन आउन अझै महिनौँ बाँकी रहँदा सरकारमा रहेकी स्वास्थ्य तथा खाद्य स्वच्छतामन्त्रीबाटै निर्वाचन लक्षित मत माग्ने गतिविधि सुरु भएपछि सरकारी जिम्मेवारी र दलगत राजनीतिक गतिविधिबीचको सीमाबारे भने प्रश्न उठेको छ।
Leave a Reply