कर्णाली स्वास्थ्य विज्ञान प्रतिष्ठानमा आरथ्रोस्कोपी शल्यक्रिया सेवा सुरु

हेल्थ टुडे,
जुम्ला,८ मंसिरः कर्णाली स्वास्थ्य विज्ञान प्रतिष्ठान जुम्लामा शुक्रबारदेखि आरथ्रोस्कोपी (दुरबीनको सहायताले जोर्नीको नसा च्यापिएको) शल्यक्रिया सेवा सुरु भएको छ । हाडजोर्नी उपचारमा जटिल र महँगो मानिने यो सेवा अमेरिकी चिकित्सक माइक भ्यान एनरिउको सहयोगमा सुरु गरिएको प्रतिष्ठानले जनाएको छ । अन्य ठाउँमा चार÷पाँच लाखसम्म खर्च लाग्ने यो शल्यक्रिया सेवा कर्णाली स्वास्थ्य विज्ञान प्रतिष्ठानमा भने करिब ४०÷५० हजार रुपैयाँमा पाइने अस्पतालले जनाएको छ ।
शुक्रबार चन्दननाथ नगरपालिका ६ छिनागाउँकी ४३ वर्षीया जानकी सुनारको घुडाँको जोर्नी र वडा नम्बर ३ बुढ्थापावाडाका ३० वर्षीय गोविन्द खत्रीको कुमको जोर्नीको शल्यक्रिया गरेर आरथ्रोस्कोपी शल्यक्रिया सेवा सुरुवात गरिएको हो । दुईवटा हाडजोर्नीको शल्यक्रिया हाडजोर्नी विभाग प्रमुख डा.मंगल रावलको नेतृत्वमा डा.धनबहादुर कार्की, डाक्टर पुजन रोकायाको टोलीले सम्पन्न गरेको हो । त्यसमा अमेरिकी डा.एनरियुको विशेष सहयोग थियो ।
डा.रावलले यतिवेला प्रतिष्ठानमा हाडजोर्नी सम्बन्धि अत्यन्त जटिल केशको उपचार गर्न उपकरण जनशक्ति र पूर्वाधार बनेको जानकारी दिए । २०६८ सालमा स्थापना भएको प्रतिष्ठानले एक दशकको अन्तरालमा क्रमशः आफ्नो गति अगाडि बढाई रहेको छ । प्रतिष्ठानमा एमआरआई बाहेक अरु सवै उपकरणको व्यवस्थापन भएको अस्पताल प्रशासनले जानकारी दिएको छ ।
प्रतिष्ठानमा रोग निधात्मक सिटि स्क्यान, एक्सरे, भिडियो एक्सरे, इन्डोसकोपी, मुटुरोग एक्सरे कोलोस्कोपी, इसिजि र ल्याब प्रयोग सेवा उपलब्ध छन् ।