सर्लाही जिल्ला अस्पतालमा आगलागी,७ लाख रुपैँया बराबरको क्षति

हेल्थ टुडे,
सर्लाही,१४ मंसिरः सर्लाहीको सदरमुकाम मलंगवामा रहेको सर्लाही जिल्ला अस्पतालमा शुक्रबार आगलागी भएको छ । आगलागीबाट अस्पतालका कम्प्युटर, ल्यापटप, फ्रिजलगायत विद्युतीय उपकरण तथा औषधि समेत जलेर नष्ट भएका छन् ।
आगलागीबाट अस्पतालमा करिब सात लाख रुपैयाँ बराबरको धनमाल क्षति भएको जिल्ला प्रहरी कार्यालय सर्लाहीले जनाएको छ । विद्युत्त सर्ट भएर अस्पतालको माथिल्लो तलाबाट आगलागी सुरु भएको प्रहरीले जनाएको छ ।
प्रहरी, स्थानीयबासिन्दा, व्यापारी र अस्पतालका कर्मचारीको सक्रियतामा आगो नियन्त्रणमा लिइएको थियो । मलंगवा नगरपालिका कार्यालयको दमकल नहुँदा आगो नियन्त्रण गर्नमा समस्या भएको अस्पतालले जनाएको छ । करिब आधा घण्टा लगाएर आगो नियन्त्रणमा आएको थियो ।