पहिलो पटक मनाइयो राष्ट्रिय गिजा स्वास्थ्य दिवस

हेल्थ टुडे,
काठमाडौं, २३ पुस : गिजा रोग तथा दन्त प्रत्यारोपण सम्बन्धी नेपाली दन्त चिकित्सक समाजको आयोजनामा नेपालमा पहिलो पटक राष्ट्रिय गिजा स्वास्थ्य दिवस मनाइएको छ । समाजले आफ्नो छैटौं बार्षिकोत्सवको अवसर पारेर नेपालमा पहिलो पटक राष्ट्रिय गिजा स्वास्थ्य दिवस मनाएको हो । स्वस्थ गिजा, स्वस्थ शरीर भन्ने मूल नाराका साथ सो अवसरमा बुधबार राजधानीको वीर अस्पतालबाट जनचेतनामुलक र्याली निकालिएको थियो ।
वीर अस्पतालबाट सुरु भएको र्याली रत्नपार्क, भद्रकाली हुदै पुन वीर अस्पतालमै सम्पन्न भएको थियो । र्यालीमा गिजा रोग सम्बन्धी दन्त चिकित्सकहरुको सहभागिता थियो । समाजका अध्यक्ष डा. सुरेन्द्रमान श्रेष्ठ गिजा बलियो भएमात्र दात बलियो हुने बताउदै गिजा स्वस्थ राख्नु पर्नेमा जोड दिए । समाजका संस्थापक अध्यक्ष डा. शैली प्रधानले दिवस मनाउनुको उद्देश्यमाथि प्रकाश पार्दै समयमै गिजाको उपचार नगराए भविश्यमा यसले मुख स्वास्थ्यमा ठूलो समस्या निम्त्याउने बताइन् ।
वरिष्ठ गिजारोग बिशेषज्ञ डा.रन्जिता गोर्खालीले दात सम्बन्धी रोगका बिषयमा थोरबहुत जनचेतना भएपछि गिजा सम्बन्धी जनचेतना नभएकाले यस सम्बन्धी जनचेतना बिस्तार गर्नु पर्ने आवश्यकतामा जोड दिइन । समाजका महासचिव डा. भागेश्वर धामीले समाजले गिजा सम्बन्धी जनचेतना जगाउन देशका अन्य भागमा पनि विभिन्न कार्यक्रम सञ्चालन गरिने जानकारी दिए । समाजका अनुसार अहिले देश भरि करिव ६५ जना गिजा रोग विशेषज्ञ छन् ।