काठमाडौं महानगरमा आजदेखि प्लास्टिकको खोल भएका सुर्तीजन्य पदार्थ निषेध

हेल्थ टुडे,
काठमाडौं, २७ मंसिर : काठमाडौं महानगरपालिकाले आज मंसिर २७ गते देखि प्लास्टिकमा प्याकेजिङ गरिएका सुर्तीजन्य पदार्थको बिक्री–वितरणमा पूर्ण निषेध गरेको छ । काठमाडौं महानगरपालिका, स्वास्थ्य विभागले १५ दिनअघि नै सूचना जारी गरेर महानगरपालिकाभित्र प्लास्टिकमा प्याकेजिङ गरिएका खैनी, गुट्खा, पान–पराग वा यस्तै प्रकृतिका सुर्तीजन्य पदार्थको बिक्री वितरण पूर्ण रुपमा निषेध गरिएको जानकारी गराएको थियो ।
महानगरले सार्वजनिक स्थानमा सुर्तीजन्य पदार्थको सेवनमा समेत पूर्णतया रोक लगाएको छ ।
महानगरका स्वास्थ्य विभागका प्रमुख रामप्रसाद पौडेलले यसअघि काठमाडौं महानगर भित्र यस्ता वस्तुको बिक्री वितरण भएको पाइएमा महानगर प्रहरीले जफत गर्ने र व्यापारीमाथि अधिकतम कारबाही समेत हुने बताएका थिए । सरकारले १२ वर्ष पहिले नै सार्वजनिक सथलमा सुर्तिजन्य पदार्थको सेवन गर्न नपाइने ऐन बनाएको भए पनि त्यसको कार्यन्वयन हुन सकेको छैन । सूर्ति उद्योगीको प्रभावमा परेर सूर्तिजन्य पदार्थमा बढाउनु पर्ने कर समेत सरकारले बढाउन सकेको छैन । स्वास्थ्य मन्त्री मोहन बस्नेतले चालु आर्थिक वर्षमा सुर्तिजन्य पदार्थमा कर बढाउने घोषणा गरे पनि अर्थ मन्त्रालयले नमाने पछि उनको योजना सफल हुन सकेको छैन ।