रामेछापमा एन्टिवायोटिक पाउनै छोड्यो !

हेल्थ टुडे

मन्थली, ७ पुष : रामेछापको सदरमुकाम मन्थली प्राथमिक स्वास्थ्य केन्द्रमा एन्टिवायोटिक सकिएको ३ महिना भइसकेको छ । तर अहिलेसम्म औषधि पुगेको छैन । औषधि नभएपछि बिशेष गरि दम र छालाका बिरामी उपचारबाट बन्चित भएका छन् ।

जोडो मौषममा बढी जसो दम र छालाको समस्या देखिने गर्छ । प्राथमिक स्वास्थ्य केन्द्र इन्चार्ज निलिजा शाक्यका अनुसार दमका विरामीलाई एजिथ्रोमाइसिन एन्टिवायोटिक र छालाका विरामीलाई एन्टी फङ्गल मलम अभावले सबैभन्दा बढी समस्या गरेको छ । अन्य औषधि भए पनि एन्टिवायोटिक नभएपछि विरामी समस्यामा परेको उनले बताइन । यो औषधि बजारमा कमै पाइने र पाइए पनि महंगो हुने भएकाले अधिकांश विरामी यो औषधिका लागि प्राथमिक स्वास्थ्य केन्द्रकै भर पर्ने गर्दथे । सरकारले यो वर्षदेखि स्थानिय तहमै औषधि खरिदको अधिकार दिएपछि यो समस्या देखिएको हो ।

मन्थली नगरपालिका स्वास्थ्य संयोजक केशव फूयालका अनुसार ४ लाख बराबरको औषधि खरिद गरि मन्थली र गेलुको स्वास्थ्य केन्द्रलाई दिइएको थियो । तर न्यून बजेटका कारण प्रयाप्त औषधि किन्न नसकिएपछि यो समस्या आएको स्वास्थ्य केन्द्रले जनाएको छ । नगरप्रमुख रमेशकुमार बस्नेतले औषधि किन्नका लागि १९ लाख विनियोजन गरिएको र चाडै खरिद प्रक्रिया थालिने बताए । जिल्लाका अधिकांश स्वास्थ्य संस्थामा औषधि अभाव रहेको जिल्ला स्वास्थ्य प्रमुख प्रकाश शाहले बताए । उनका अनुसार स्थानिय निकायका अधिकारीले स्वास्थ्य सेवाको संवेदनसिलता नबुझेका कारण समस्या आएको हो ।