काठमाडौ,१८ फागुन । यूरोपियन मुलुक स्पेन संसारकै सबैभन्दा बढी स्वस्थ देश भएको पाइएको छ । संसारका १६९ देशका स्वास्थ्यसम्बन्धी विषयमा गरिएको मूल्याङ्कनमा स्पेन सबैभन्दा बढी स्वस्थ देश भएको पाइएको हो । स्पेनपछि इटाली दोस्रो सबैभन्दा स्वस्थ मुलुकका रूपमा अगाडि देखिएको छ । यी दुवै देशले आफ्ना मुलुकवासीका लागि प्रतिनागरिक तीन हजार ५०० डलर (चार लाख रुपियाँ) खर्च गर्छन् ।
‘ब्लुमबर्ग हेल्थियस्ट कन्ट्री इन्डेक्स’को २०१९ संस्करणका अनुसार स्पेन र इटालीपछि क्रमशः आइसल्यान्ड, जापान तथा स्वीट्जरल्यान्ड छन् । उक्त सूचीमा देशवासीको सम्पूर्ण स्वास्थ्यस्थितिका अतिरिक्त सङ्क्रामक तथा गैरसङ्क्रामक रोगबाट हुने मृत्यु तथा औसत आयुका साथै पर्यावरणीय पक्षजस्ता कुरालाई ध्यानमा राखिएको थियो ।
यस्तै,उक्त इन्डेक्सका अनुसार आफ्ना नागरिकको स्वास्थ्यमा सबैभन्दा बढी खर्च गर्ने राष्ट्रमा अमेरिका अग्रपंक्तिमा छ भने जसले प्रतिनागरिक ११ हजार डलर (झन्डै साढे १२ लाख रुपियाँ) स्वास्थ्यका लागि खर्च गर्छ । यति हुँदाहुँदै पनि अमेरिका यो सूचीमा ३५औँ नम्बरमा रहेको छ । विगत तीन वर्षदेखि अमेरिकाका नागरिकको औसत आयु घट्दै गएको जनाइएको छ । बेलायतले चार हजार डलर (साढे चार लाख रुपियाँ) खर्च गर्छ र १९औँ स्थानमा छ ।
शीर्ष १० स्वस्थ मुलुकका रूपमा रहेका आइसल्यान्ड, जापान, स्वीट्जरल्यान्ड, स्वीडेन, अस्ट्रेलिया, सिङ्गापुर तथा नर्वेजस्ता मुलुकले आफ्ना नागरिकका हेल्थ केयर अर्थात् स्वास्थ्य हेरचाहका लागि ७० प्रतिशतभन्दा बढी खर्च गर्छन् । इन्डेक्समा माथिल्लो श्रेणीमा रहेका अधिकांश मुलुक युरोपेली महादेशका छन् ।
चीन ५२ औँ स्थानमा छ भने भारत १२०औँ स्थानमा । यस्तै दक्षिण एसियाली मुलुकमा श्रीलङ्का, बङ्गलादेश तथा नेपाल क्रमशः ६६, ९१ र ११० औँ स्थानमा छन् । पाकिस्तान १२४ र अफगानिस्तान १५३ औँ स्थानमा रहेको देखाइएको छ । संसारका ३० सबैभन्दा अस्वस्थ मुलुकमा २७ वटा अफ्रिकाका छन् र बाँकी हैटी, अफगानिस्तान तथा यमन रहेको इन्डेक्समा उल्लेख गरिएको छ ।
अनुसन्धानकर्ताले खानपिन शैली नै स्वास्थ्यस्तरको मूल कारक तत्व रहेको औँल्याएका छन् । उनीहरुले स्पेन तथा इटालीका मानिस मेडिटेरियन डाइटमा जोड दिने भएकाले बढी स्वस्थ रहेको जनाएका छन् । यसमा मुख्य गरेर जैतुनको तेल, काजु, बदाम, ओखर उनीहरूका खानाको मुख्य अंश भएकाले पनि मुख्यतया मुटुसम्बन्धी रोगमा नियन्त्रणमा आइरहेको छ ।(गोरखापत्र दैनिकबाट)
Leave a Reply