टुँडिखेलमा आजदेखि एक हप्ते निःशुल्क योग शिविर सुरु

हेल्थ टुडे,
काठमाडौ,२६ फागुनः काठमाडौको टुँडिखेलमा आजदेखि एक हप्ते निःशुल्क योग शिविर सुरु भएको छ । मनोक्रान्ति केन्द्रले आयोजना गरेको उक्त योग शिविर चैत २ गतेसम्म चल्नेछ । आजदेखि एक साता टुँडिखेलमा हरेक दिन विहान साढे ६ बजे देखि साढे ८ बजे सम्म योग शिविर सञ्चालन हुने आयोजकले जनाएका छन् ।

आयोजक मनोक्रान्ति केन्द्र स्थापनाको ३२ औँ बर्ष पुगेको अवसरमा निःशुल्क योग शिविर गरिएको संस्थाका अध्यक्ष डा.योगी विकासान्दले जानकारी दिए । शिविरमा सहभागी सबैलाई सातै दिन योगी विकासान्दले नै योग गराउनेछन् । नसर्ने रोगहरुको जोखिम बढिरहेको अवस्थामा योगबाट यस्ता रोगहरुको जोखिम कम गर्न र तनावमुक्त जीवन जिउन प्रेरित गर्ने उद्देश्यले शिविर गरिएको आयोजकले जनाएका छन् ।

योग शिविर अवधिभर काठमाडौं बाहिरबाट आउने व्यक्तिहरुलाई आवासिय व्यवस्था समेत गरिएको छ । योग शिविरमा दैनिक झण्डै १० हजार जनाको सहभागिता हुने आयोजकको अपेक्षा छ । निःशुल्क योग शिविरको प्रचार प्रसारका लागि मुलुकभरका मनोक्रान्ती केन्द्रहरुलाई आमन्त्रण गरिएको थियो ।

एक हप्ते योग शिविर सञ्चालनमा १८ लाख भन्दा बढी खर्च हुने आयोजकले अनुमान गरेका छन् । शिविरको पहिलो दिन योग गर्न आउनेहरुको उल्लेख्य सहभागिता रहेको आयोजकले जनाएको छ । शिविरको पहिलो दिन डा.विकासन्दले योग गराएका छन् ।