सनमले जितिन ‘ मिस नेपाल पिस ’ को उपाधि

हेल्थ टुडे
मिस नेपाल पिस २०७३ को उपाधि ललितपुर नर्सिङकी समन थापामगरले जितेकी छन् । त्यसैगरि फस्ट रनर अफको उपाधि म्याग्दीकी सपना छन्त्यालले हात पारेकी छन् भने चितवनकी एरी श्रेष्ठले सेकेन्ड रनर अफ भएकी छन् । नेपाल ब्रेष्ट क्यान्सर फाउण्डेसनको सहकार्य तथा नेप्कम इजुकेशन कन्सल्टेन्सीको प्रयोजनमा नेक्स्ट मोडेल्स नेपालले बिहीबार राजधानीमा आयोजना गरेको अन्तिम प्रतिस्पर्धी २७ जना नर्सहरुलाई पछि पार्दै सनमले उपाधि चुमेकी हुन । प्रमुख निर्णायक नेपाल चिकित्सक संघका महासचिव डा. लोचन कार्कीले टप टेनमा पुग्न सफल नर्सहरुलाई साझा प्रश्न सोधेका थिए । तपाई शान्तिदूतका रुपमा अरुलाई शान्ति स्थापनाका लागि कसरी प्रभावित पार्न सक्नु हुन्छ ? डा. कार्कीको यही प्रश्नको सटिक जवाफ दिएर सनमले उपाधि हात पारेकी हुन । प्रतियोगिताको निर्णायकका रुपमा कार्यक्रमकी प्रमुख अतिथि प्रसूति गृहकी पूर्व निर्देशक डा. शिला वर्मा, वरिष्ठ चलचित्र निर्देशक दीपक श्रेष्ठ, वरिष्ठ फेसन फोटोग्राफर राजभाइ सुवाल, नेपाल ब्रेष्ट क्यान्सर फाउण्डेसनकी अध्यक्ष डा. सुजिता हिराचन, डा. सन्ध्या चापागाई र चिकित्सक संघका महासचिव डा. लोचन कार्की थिए । बिगत ३ वर्षसम्म मिस नर्सका रुपमा प्रतियोगिता आयोजना हुदै आईरहकोमा यो वर्ष देखि यसको दायरा फराकिलो बनाउदै मिस नेपाल पिसको रुपमा अगाडि बढाएको आयोजक नेक्स्ट मोडेल्स नेपालका कार्यकारी निर्देशक रवि धमलाले बताए । प्रतियोगिताको इमेज टेलिभिजनले प्रत्यक्ष प्रशारण गरेको थियो । प्रतियोगिताको अफिसियल मिडियाको रुपमा हेल्थ टुडे रहेको थियो ।