स्वास्थ्य संस्थामा बच्चा जन्माए एक किलो घिउ

हेल्थ टुडे,

कैलाली, १६ मंसिर : मातृ मृत्यु र बालमृत्यु घटाउन स्वास्थ्य संस्थामा प्रसूति सेवा लिन उत्प्रेरणा प्रदान गर्ने उद्देश्यले स्थानिय निकायले विभिन्न कार्यक्रम लागु गर्न थालेका छन् । कसैले स्वास्थ्य संस्थामा आएर बच्चा जन्माउने महिलालाई स्वास्थ्य मन्त्रालयले प्रदान गर्ने यातायत खर्च दोब्बर दिन थालेका छन् भने केहीले नवजात शिशुको बैंक खाता नै खोलेर रकम जम्मा गर्न थालेका छन् । कसैले स्वास्थ्य संस्थामा जन्मिने बच्चाको उपचार निशुल्क गर्ने भनेका छन् त केहीले कुखुरा पनि दिन थालेका छन् । स्वास्थ्य संस्थामा गएर बच्चा जन्माउने महिलाको संख्या बढाउने यही अभियानमा कैलालीका गौरीगंगा नगरपालिकाले भने अरुको भन्दा नयाँ योजना लागु गरेको छ । उसले स्वास्थ्य संस्थामा आएर बच्चा जन्माउने हरेक महिलालाई एक किलोग्राम शुद्व घिउ दिने गरेको छ । नगरपालिकाकी उपप्रमुख अचला चौधरीका अनुसार यही आर्थिक वर्षको प्रारम्भदेखि सुरु भएको यो कार्यक्रमबाट अहिलेसम्म एकसय ५० भन्दा बढी महिलाले स्वास्थ्य संस्थामा बच्चा जन्माए बाफत एक एक किलोग्राम घिउ लगिसकेका छन् ।

उपमेयर चौधरीले भनिन, ‘स्वास्थ्य संस्थामा सुत्केरी गराए बाफत एक किलोग्राम शुद्व घिउ उपहार दिने कार्यक्रम निकै लोकप्रिय भइरहेको छ । यसले सुत्केरी आमाको स्वास्थ्यलाई पनि फाइदा गरेको पाइएको छ । ’ सुत्केरी भएपछि घिउले तन्दुरस्त बनाउन सहयोग गर्ने र छुट्टै नयाँ कार्यक्रम भएकाले नगरपालिकाले यसलाई अगाडि बढाइरहेको चौधरीले बताइन । ठूलो संख्यामा थारु बसोवास भएको यो नगरपालिकामा आधा भन्दा बढी महिला अझै घरमै बच्चा जन्माउने गरेका छन् । यरो उपचार पाउन चार पटक गर्भवती जाच गराएको हुनु पर्छ । यो अभियानमा महिला स्वास्थ्य स्वयं सेविकाहरुको साथ र सहयोग रहेको छ । स्वास्थ्य मन्त्रालयको तथ्यांक अनुसार ५७ प्रतिसत महिलाले मात्र स्वास्थ्य संस्थामा गएर सुरक्षित सुत्केरी सेवा लिने गरेका छन्् । पहिलेको तुलनामा दक्ष स्वास्थ्यकर्मीबाट स्वास्थ्य संस्थामै गएर बच्चा जन्माउने प्रचलन बढ्दै गइरहेको छ । सन् १९९६ को जनसांख्यिक स्वास्थ्य सर्वेक्षण अनुसार जम्मा ८ प्रतिसत महिलाले मात्र स्वास्थ्य संस्थामा गएर बच्चा जन्माउने गरेका थिए भने २०१६ मा त्यो संख्या बढेर ५७ प्रतिसत पुगेको छ । सरकारले स्वास्थ्य संस्थामा गएर बच्चा जन्माउने चलनलाई बढावा दिन सरकारी स्वास्थ्य संस्थामा प्रसूति सेवा निशुल्क गर्नुका साथै सुत्केरीलाई यातायत खर्च वाफत हिमालमा १५ सय, पहाडमा एक हजार र तराईमा पाँच सय रुपैया प्रदान गर्ने गरेको छ ।