काठमाडौ,१२ फागुन । ‘एक विद्यालय, एक नर्स’ कार्यक्रमअन्तर्गत स्वास्थ्य तथा जनसंख्या मन्त्रालयले विद्यालयहरुमा नर्स खटाउन सुरु गरेको छ । मन्त्रालयले यौन तथा प्रजननलगायत स्वास्थ्य चेतना र जाँचका लागि विद्यालयहरुमै नर्स खटाउन सुरु गरेको हो । मन्त्रालयले ‘पाइलटिङ प्रोजेक्ट’का रूपमा तत्काल प्रदेश ३ का २० विद्यालयमा नर्स खटाएको छ ।
बालबालिका घरबाहेक बढी समय विद्यालयमा रहने र उनीहरूलाई स्वास्थ्य समस्या पर्दा उपचार नभएपछि सरकारले सबै सामुदायिक र निजी विद्यालयमा अनिवार्य नर्स राख्ने नीति ल्याएको हो । प्रदेश ३ को सामाजिक विकास मन्त्रालयले नेपालको इतिहासमै पहिलोपटक सामुदायिक विद्यालयमा यस्तो सेवा सुरु भएको जनाएको छ ।
विद्यालयमा नर्सले किशोर–किशोरीलाई प्रजनन, परिवार नियोजन, महिनावारी स्वास्थ्य र यौन तथा यौनिकताका विषयमा परामर्श दिनेछन् । यस्तै, व्यक्तिगत÷वातावरणीय सफाइ तथा फोहोरमैला व्यवस्थापन, स्वस्थकर जीवनशैली, सामान्य स्वास्थ्य परीक्षण र पोषणको लेखाजोखा गर्नेछन् ।
स्वास्थ्य जटिल भए थप उपचारका लागि अन्यत्र पठाउनुपरे स्वास्थ्य संस्थासँग समन्वय काम पनि विद्यालयमा खटिएका नर्सले गर्नेछ । यस्तै,उनीहरुले अखाद्य बस्तु प्रयोगमा नियन्त्रण, यौनजन्य हिंसा न्यूनीकरण, शारीरिक तथा मानसिक स्वास्थ्य शिक्षा, ध्रुमपान तथा मद्यपान र सूर्तिजन्य पदार्थको दुरुपयोग न्यूनीकरणका लागि अभिभावक तथा समुदायलाई स्वास्थ्य शिक्षा प्रदान गर्ने जिम्मेवारी पनि पाएका छन् ।
यस्तै, रजश्वलाका वेला छात्राहरू लजाउने, प्याड प्रयोग गर्न अप्ठ्यारो मान्ने समस्या रहेकोमा विद्यालयमा खटिएका नर्सहरुले प्याडको आवश्यकता र यौन स्वास्थ्यबारे पनि सिमाउँनेछन् ।
Leave a Reply