हेल्थ टुडे,
धरान,२७ जेठः सुनसरीको धरान उपमहानगरपालिकामा डेंगुका बिरामी बढ्नेक्रम जारी छ । बीपी कोइराला स्वास्थ्य विज्ञान प्रतिष्ठान धरानमा आइतबार साँझसम्म उपचार गर्न पुगेकामध्ये ३ सय १४ जनामा संक्रमण पोजेटिभ देखिएको छ । डेंगु महामारी फैलिएपछि एडिज एजिप्टाइ र एडिज एल्बो पिकस जातिको मच्छरको अण्डा, लार्भा र प्युपा नष्ट गर्न व्यापक रूपमा सर्च एन्ड डेस्ट्रोय अभियान जारी राखे पनि संक्रमितको संख्या दिनदिनै बढिरहेको छ ।
अस्पताल सहायक निर्देशक डा.विकास साहले प्रतिष्ठानमा पछिल्लो तीन दिनमा मात्र १०२ जना संक्रमित उपचारका लागि आएका जानकारी दिए । संक्रमित सबै धरानका हुन् । अत्यधिक ज्वरो आएपछि उपचारका लागि आएका १ हजार १९ जनामध्ये १ सय १४ जनामा डेंगु भाइरल भेटिएको हो । उनका अनुसार तीमध्ये २५ जना आइतबार आकस्मिक कक्षमा आएका नयाँ संक्रमित हुन् । चिकित्सकले धरानमा फैलिएको डेंगु टाइप टु भएको र एडिस एजिप्टाइ तथा एडिज एल्बो पिकस जातिको लामखुट्टेको टोकाइबाट संक्रमण फैलिएको जनाएका छन् ।
यसैबीच, धरानस्थित पूर्वाञ्चल इन्जिनियरिङ क्याम्पसमा ६० बढी विद्यार्थीमा डेंगुको संक्रमण देखिएपछि क्याम्पस प्रशासनले पाँच दिन क्याम्पस बन्द गर्ने निर्णय गरेको छ । धरान उपमहानगरपालिकाका १५ र ८ वडामा सबैभन्दा बढी संक्रमित देखिएका छन् । उक्त क्याम्पसका विद्यार्थी पनि वडा १५ र वडा ८ कै घरमा कोठा भाडामा लिएर बस्ने गरेकाले विद्यार्थी नै बढी संक्रमित भएका छन् ।
उपमहानगरपालिकाले पनि यी दुवै वडालाई पाँच दिनअघि नै स्वास्थ्य संकटग्रस्त क्षेत्र घोषणा गरिसकेको छ । डेंगुको महामारी फैलिएपछि क्याम्पसका सिभिल इन्जिनियरिङ, मेकानिकल इन्जिनियरिङ, इलेक्ट्रिकल इन्जिनियरिङ, कृषि इन्जिनियरिङ, कम्प्युटर इन्जिनियरिङमा अध्ययनरत विद्यार्थीले कक्षा छाडेर घर जानेक्रम बढेको छ ।
धरान उपमहानगरपालिका स्वास्थ्य शाखा प्रमुख तथा डेंगु नियन्त्रणका लागि बनेको र्यापिड रेस्पोन्स टिमका सदस्य रामबाबु यादवले धरानमा सर्च एन्ड डेस्ट्रोय अभियानलाई प्रभावकारी बनाउन थप १० वटा टोली गठन गरेको जानकारी दिएका छन् । आइतबारदेखि धरानका विभिन्न शैक्षिक संस्थामा सचेतना अभियान चलाउन सुरु गरिएको छ । प्रत्येक टोलीमा बीपी कोइराला स्वास्थ्य विज्ञान प्रतिष्ठानका इन्टर्न चिकित्सक र चिकित्साशास्त्र अध्ययनरत एमबीबीएसका विद्यार्थी २ जना रहने गरी टोली गठन गरिएको छ ।
Leave a Reply