२ दिनमा ३ नयाँ संक्रमित थपिए, नेपालमा कोरोना संक्रमितको संख्या ५७ पुग्यो

हेल्थ टुडे,
काठमाडौँ, १७ बैशाख : बिगत २ दिनमा नेपालमा थप ३ जना कोरोना संक्रमित थपिएका छन । बारा २ र पर्सामा १ गरी थप ३ जनामा कोरोना भाइरस संक्रमण देखिएपछि कोरोना संक्रमितको संख्या ५७ पुगेको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले बताए । भारतको नयाँ दिल्लीबाट फर्किएका बाराका ३१ बर्षिय र ४३ बर्षिय पुरुष तथा पर्साका ४६ बर्षिय पुरुषको राष्ट्रिय जनस्वास्थ्य प्रयोगशालामा गरिएको परीक्षणमा उनीहरूमा कोरोना संक्रमण भएको पुष्टि भएको डा. देवकोटाले जानकारी दिए । उनीहरु सिमराको क्यारेन्टाइनमा बसेका थिए । अहिले उनीहरुको नारायाण अस्पतालमा उपचार भइरहेको छ । संक्रमित मध्ये १६ जना निको भएर घर फर्किसकेका छन भने ४१ ज्ना उपचारमा छन ।