नेपालगञ्ज कोरोनाको रेडजोन बन्न सक्ने खतरा, एकै दिन फेला परे ९ संक्रमित

हेल्थ टुडे,
काठमाडौं, २१ बैसाख : उदयपुरपछि सबैभन्दा बढी कोरोना संक्रमित नेपालगन्जमा फेला परेका छन् । नेपालगन्जमा आईतबार एकै दिन थप ९ जना कोरोना संक्रमित फेला परेका हुन । स्वास्थ्य तथा जनसंख्या मन्त्रालयका प्रवक्ता डा.विकास देवकोटाले नेपालगन्जमा ५ जना पुरुष र ४ जना महिला गरि एकै दिन ९ जनामा कोरोना पोजेटिभ देखिएको जानकारी दिए । यहाँ एक जनामा यो भन्दा पहिले संक्रमण देखिएको थियो । एकैदिन ९ जनामा कोरोना संक्रमण देखिएपछि भारतसंग सिमा जोडिएको नेपालगन्ज कोरोनाको रेड जोन हुनसक्ने भन्दै स्थानियले चिन्ता व्यक्त गरेका छन । दुई दिन अगाडि नेपालगन्जमा फेला परेका संक्रमितको सम्पर्कमा आएकाहरुमा नै कोरोना पोजेटिभ देखिएको हो । दुई दिन अगाडि कोरोना पोजेटिभ देखिएका व्यक्ति शिक्षक भएकाले लकडाउनका बेला स्कुल बन्द भएपछि उनी घर घरमा गएर बालबालिकालाई पढाउने गरेका थिए । त्यसैले उनको सम्पर्कमा आएका व्यक्तिहरुको खोजी गरि परिक्षण गर्दा सात वर्षको बालकमा पनि कोरोना पोजटिभ देखिएको छ । उनको सम्पर्कमा आएका अन्य व्यक्तिहरुको नमुना परिक्षण भइरहेको जनस्वास्थ्य प्रयोगशालाले जनाएको छ । त्यसैगरि बिरगन्जका एक पुरुषमा पनि आईतबार नै कोरोना पोजेटिभ देखिएको छ । यसरी देशभरि कोरोना पोजेटिभको संख्या ५९ पुगेको छ । ती मध्ये १६ जना निको भएर घर फर्किसकेका छन् ।