नेपाल चिकित्सक संघसँग सहकार्य गरेर अगाडि बढ्ने स्वास्थ्य मन्त्री यादवको प्रतिवद्वता

हेल्थ टुडे,
काठमाडौं, १३ बैसाख : उपप्रधानमन्त्री एवं स्वास्थ्य तथा जनसंख्या मन्त्री उपेन्द्र यादवले नेपाल चिकित्सक संघसँग सहकार्य गरेर अगाडि बढ्ने प्रतिवद्वता जनाएका छन् । मन्त्री यादवको स्वागतमा चिकित्सक संघले बुधबार राजधानीमा आयोजना गरेको कार्यक्रममा बोल्दै यादवले चार वर्ष पहिले स्वास्थ्य मन्त्री भएका बेला पनि चिकित्सक संघसित मिलेर काम गरेको स्मरण गर्दै भविश्यमा पनि सहकार्य गरेर स्वास्थ्यका समस्या हल गर्ने बताएका हुन । यादवले भने, ‘ स्वास्थ्यमा भएका तमाम समस्या हामी मिलेर मात्र हल गर्न सक्छौ । चिकित्सक संघको सल्लाह र सुझावका आधारमा स्वास्थ्य मन्त्रालय अगाडि बढ्न चाहन्छ । ’ आफुले कुनै पनि चिकित्सक वा कर्मचारीलाई राजनीतिक आस्थाका आधारमा भेदभाव नगर्ने बताउदै मन्त्री यादवले दक्ष्य चिकित्सकलाई अवसरबाट बन्चित नगर्ने प्रतिवद्वता जनाए । उनले भने, ‘ म कुन डाक्टर कुन बिचारको भन्ने बुझ्दिन । बिचारले समाजमा काम गर्ला । तर मेडिकलमा त दक्षताले काम गर्छ । दक्ष चिकित्सकले अवसरबाट बन्चित हुनु पर्दैन । ’ तर आवश्यकताका आधारमा भने जिम्मेवारी परिवर्तन गर्न सकिनेमा उनले जोड दिए ।
चिकित्सक संघका पूर्व अध्यक्ष डा. केदारनरसिंह केसीले नयाँ मन्त्री आउना साथ उसको काम नै अस्पतालका डाइरेक्टर र महासाखा र साखाका कर्मचारी परिवर्तनतिर लाग्ने भएकाले कर्मचारीको मनोवल खस्कने गरेको प्रसंग उल्लेख गर्दै त्यसो गर्दा स्वास्थ्यका समस्या हल नहुने तर्फ मन्त्री यादवलाई सचेत गराए पछि मन्त्री यादवले आग्रह पुर्वाग्रहका आधारमा जिम्मेवारी परिवर्तन नगर्ने बताएका हुन । यादवले स्वास्थ्यको बजेट बढाउन र स्वास्थ्यमा जनशक्ति थप्न आफु लागिपरेको जानकारी दिएका थिए ।
स्वास्थ्य तथा जनसंख्या मन्त्रालयका सचिव डा. रोसन पोखरेलले केन्द्रीय सरकार मातहत २७ सय मात्र चिकित्सकको दरबन्दी रहेको जानकारी दिदै केही दिनमै करिव ३ हजार दरबन्दी थप हुने गरि काम अगाडि बढेको बताए ।
नेपाल चिकित्सक संघका अध्यक्ष डा. अनिल विक्रम कार्कीले चिकित्सकलाई रोजगारीको सुरक्षा, आर्थिक सुरक्षा, भौतिक सुरक्षा, समाजिक सुरक्षा र नीतिगत सुरक्षा गरि ५ वटा सुरक्षाको प्रत्याभूति राज्यले दिन समेत स्वास्थ्य क्षेत्रमा अहिले देखिएका समस्या हल गर्न सकिने बताए । अध्यक्ष डा. कार्कीले चिकित्सकहरुको सेवा सुविधा एकदमै न्युन भएको बताउदै कम्तिमा पनि नेपाली चिकित्सकको सेवा सुविधा सार्क देशका चिकित्सक सरह हुनु पर्नेमा जोड दिए । स्वास्थ्य बजेटको ३३ प्रतिसत बजेट जनशक्तिमा खर्च गर्नु पर्ने डा. कार्कीले मन्त्री यादवलाई सुझाव दिए । कार्यक्रममा नेपाल मेडिकल काउन्सिलका अध्यक्ष डा. चोपलाल भुसाल, न्याम्सको उपकुलपति डा. भुपेन्द्र बस्नेत। पुर्व स्वास्थ्य सचिव डा. सुधा शर्मा, मुटुरोग विज्ञ डा. भगवान कोइराला सहित चिकित्सक संघका पदाधिकारी र वरिष्ठ चिकित्सकहरु सहभागी थिए ।