युवा सिर्जनशिल समाजद्वारा विद्यार्थीलाई सूर्तिजन्य पदार्थविरुद्व सचेतना

हेल्थ टुडे,
काठमाडौं, १८ बैसाख : युवा सिर्जनशिल समाजले काठमाडौं महानगरपालिकाका विभिन्न स्कुलमा अध्ययनरत विद्यार्थीहरुलाई सूर्तिजन्य पदार्थ र दुव्यसनी विरुद्व सचेतना कार्यक्रम सुरु गरेको छ । काठमाडौं महानगरपालिका वडा नम्बर १० को सहकार्यमा समाजले सचेतना कार्यक्रम सुरु गरेको हो । समाजले मंगलबार कामनपा १० देबीनगरमा रहेको रुद्रमती आधारभूत स्कुलमा अध्ययरत विद्यार्थीहरुलाई सचेतना कार्यक्रम सम्पन्न गरेको छ । सानै उमेरदेखि सूर्तिजन्य पदार्थ सेवनबाट टाढै बस्नु पर्छ भन्ने सचेतना दिलाउन समाजले कक्षा ३ देखि ५ सम्मका विद्यार्थीहरुलाई सचेत गराएको थियो ।
कार्यक्रममा युवा सिर्जनशिल समाजका अध्यक्ष एवं समाजसेवी शारदा लामाले सूर्तिजन्य पदार्थ सेवनले मानिसको जिवनमा गर्ने हानी र दुव्र्यसनका कारण परिवारले समेत भोग्नु पर्ने पिडाका बिषयमा सानै उमेर बालबालिकादेखि नै सचेतना दिने उद्देश्यले पहिलो कार्यक्रम रुद्रमती आधारभूत स्कुलबाट सुरु गरिएको जानकारी दिइन । उनले यस किसिमका सचेतनामूलक कार्यक्रम वडाका अन्य स्कुलहरुमा पनि क्रमश सञ्चालन गर्ने बताइन ।
कामनपा वडा नम्बर १० का सदस्य नरोज अर्यालले स्वस्थ्य समाज निर्माणका लागि हरेक व्यक्तिले स्वास्थ्यका विषयमा गंम्भिर हुनै पर्ने बताउदै सूर्तिजन्य पदार्थ विरुद्वको अभियानमा विद्यार्थीहरुलाई साथमा लिएर अगाडि बढ्नु पर्नेमा जोड दिए । विद्यालयहरुमा गरिने यस किसिमका सचेतनामूलक कार्यक्रम फलदायी हुने अर्यालले बताए ।
कार्यक्रमका प्रशिक्षक स्वास्थ्य पत्रकार पदमराज जोशीले सुर्तिजन्य पदार्थको सेवनबाट हुने आर्थिक, समाजिक र शारिरीक हानीका बिषयमा चर्चा गर्दै हरेक विद्यार्थीले आआफ्नो घरबाटै सुर्तिजन्य पदार्थ सेवन बन्द गराउने अडोटका साथ कदम चाल्नु पर्ने बताए । जोशीले भने, ‘ हरेक विद्यार्थीले आफ्नो घरलाई सूर्तिजन्य पदार्थ मुक्त बनाउन सक्यौ भने यो अभियानलाई ठूलो सघाउन पुग्छ । कसैका आमाबुबाले धूमपान गर्नु हुन्छ भने तपाईहरुले उहाँहरुलाई सेवन गर्न रोक्न सक्नु पर्छ । एक पटक नमाने पनि बारम्बार भन्र्दै गए मान्नु हुन्छ । ’
उनले सरकारले सार्वजनिक स्थलमा सूर्तिजन्य पदार्थ सेवन गर्न नपाइने कानून ल्याएको जानकारी दिदै त्यसको कार्यन्वयनमा सबै लाग्नु पर्ने बताए । कार्यक्रममा स्कुलकी प्रधानाध्यापक मञ्जु श्रेष्ठले यस किसिमका कार्यक्रम निकै लाभदायक हुने बताउदै स्कुललाई सूर्तिजन्य पदार्थरहित बनाएको बताइन । पत्रकार कालिका महतले सूर्तिजन्य पदार्थ विरुद्वको अभियान एक व्यक्तिको पहलले मात्र पुरा नहुने बताउदै सबैको सहकार्य हुनु आवश्यक रहेकोमा जोड दिए ।