हेल्थ टुडे,
काठमाडौँ, २७ चैत : चैत १५ गतेको घटनामा कोटेश्वर बालकुमारी नजिक गोली लागेर गम्भिर घाइते भएर हाल सिभिल हस्पिटलमा उपचार गराइरहेकी कोटेश्वर बहुमुखी क्याम्पस व्यवस्थापन संकाय तेश्रो वर्षमा अध्ययनरत छात्रा रेविका खत्रीलाई गृह मन्त्री रमेश लेखकले बुधबार भेटेका छन् । गृह मन्त्री मन्त्री लेखकले रेविका र उनका आफ्न्तसँग स्वास्थ्य अवस्था र उपचारका विषयमा कुराकानी गरेका थिए । मन्त्री लेखकले चैत १५ को घटनामा घाइते भएकाहरूको उपचार खर्च सरकारले व्यहोर्ने प्रतिबद्धता जनाएका छन् । लेखकले भने, ‘घाइतेहरूलाई निःशुल्क उपचार गर्ने निर्णय कार्यान्वयन हुन्छ ।’
घाइतेहरूले निःशुल्क उपचार प्राप्त गरेकी गरेनन् भनेर हेर्न आफू अस्पताल आएको उल्लेख गर्दै मन्त्री लेखकले भने, ‘खर्च गरेको बिल अस्पताल मार्फत स्वास्थ्य मन्त्रालयमा जान्छ, भुक्तानी स्वास्थ्य मन्त्रालयले गर्छ ।’
घाइतेका परिवारले खर्च गरेको भए पनि अस्पतालले बिल भौचर प्रमाणित गरेर पठाएको अवस्थामा भुक्तानी दिइने उनले बताए । बिरामीहरूलाई आश्वासन दिँदै उनले भने, ‘पहिला उपचार गर्नुस्, बाहिरबाट ल्याएको औषधीको पनि स्वास्थ्य मन्त्रालयमा मार्फत भुक्तानी हुन्छ ।’ रेविकाको उपचारमा कुनै कमि हुन नदिन कोटेश्वर क्याम्पस प्रशासन र स्वतन्त्र विद्यार्थी युनियनले गृह मन्त्री लेखकलाई ज्ञापन पत्र बुझाएका थिए । क्याम्पसका विद्यार्थीहरुले चार दिनसम्म सडकमा प्रदर्शन समेत गरेका थिए ।
Leave a Reply