योग गर्दा यी कुरा नबिर्सौ 

स्वस्थ्य शरीर, मस्तिष्क र आत्माको लागि योग एकदमै फाइदाजनक हुन्छ । तर, योग गर्दा केही सावधानी अपनाउनुपर्छ । योग गर्दा केही नियम अनिवार्य पालना गर्नुपर्छ । उक्त नियम पालना नगर्दा योगबाट फाइदा होइन, बेफाइदा हुन सक्छ । तसर्थ योग गर्दा केही कुरामा हामीले ख्याल राख्नै पर्छ ।

१. योग गर्नसाथ तुरुन्तै नुहाउनु हुँदैन । योग गर्दा शारीरिक तापमान बढ्छ । त्यसैले योग गरेको एक घन्टापछि मात्र नुहाउनुपर्छ । नभए, रुँघा, खोकीजस्ता समस्या आउन सक्छ ।

२. योग गरिरहेको समयमा बाथरुममा जानु उचित हुँदैन । बरु, आफ्नो शरीरको पानी पसिनाको माध्यमबाट बाहिर निकाल्नु पर्छ ।

३. योग गरिरहेको बेला शरीर तातो हुन्छ । यतिबेला चिसो पानी पिउनु लाभदायक हुँदैन । चिसो पानीले एलर्जी, खोकी लाग्ने सम्भावना हुन्छ ।

४. वज्रासनबाहेक अन्य कुनै पनि योग खाना खानसाथ गर्नुहुन्न । खाना खाएको कम्तीमा पनि तीन घन्टाको अन्तरालमा योग गर्नु सही हुन्छ । सबैभन्दा राम्रो त बिहान खाली पेटमा योग गर्नु हो ।

५. योग कठिन आसनबाट सुरु गर्नु हुँदैन । सरलबाट कठिनतिर जानुपर्छ ।

६. जब तपार्इं बिमार हुनुहुन्छ भने योग नगर्नुहोस् । यदि योग गर्न चाहनुहुन्छ भने योग गुरु वा चिकित्सकको परामर्श लिनुहोस् ।

७. योग गर्नुअघि थोरै वार्मअप गर्नुहोस् । यसपछि प्राणायाम र त्यसपछि योग गरौं । अन्त्यमा शवासन जरुर गरौं ।

८. योग गुरुको सल्लाह वा निगरानी बिना जथाभावी योग गर्नु हुँदैन । किताब पढेर वा सीडीमा हेरेर योग गर्दा समस्या हुन सक्छ । अर्काको देखासिकी गरेर पनि योग नगरौं ।

९. कम्मर, मांसपेशी वा घुँडासँग सम्बन्धित कुनै समस्या छ भने योग गर्नुअघि विज्ञसँग सल्लाह लिनुहोस् ।