महानिर्देशक पौडेलले गरे पदबहाली

हेल्थ टुडे,

काठमाण्डौ,२ माघ :स्वास्थ्य सेवा विभागका नव नियुक्त निमित्त महानिर्देशक डा. तारा पौडेलले विभागमा पदबहाली गरेका छन् । विभागका महानिर्देशक डा. राजेन्द्र पन्तलाई मन्त्रालय सरुवा गरेर स्वास्थ्य मन्त्री दीपक बोहोराले मन्त्रीस्तरीय निर्णय गरेर डा. पौडेललाई महानिर्देशकको जिम्मेवारी दिएका हुन् । तनँहुको व्यास नगरपालिका ६ निवासी डा. पौडेल पश्चिमाञ्चल क्षेत्रिय स्वास्थ्य निर्देशनालयका पूर्व निर्देशक हुन् । विसं २०१८ सालमा जन्मेर २०३४ सालमा एसएलसी प्रथम श्रेणीमा उर्तीण गरेका पौडेलले महाराजगन्ज क्याम्पसबाट हेल्थ असिस्टेन्ट (एचए) पास गरेका हुन् । त्यसपछि आईओएमबाट एमबिबिएस र एमडीको पढाई पुरा गरेका हुन् । २०३९ सालमा डडेल्धुराको जोगबुढा स्वास्थ्यचौकीबाट सरकारी सेवा सुरु गरेका उनले ३६ वर्षको सरकारी सेवा राजधानी बाहिर बसेर नै बिताएका छन् । संघिय संरचनामा स्वास्थ्य सेवालाई जनताको घरदैलोसम्म पुर्याउन आफू कुनै कसर बाकी नराखेर लाग्ने डा. पौडेलले बताए ।