डा. केसीलाई काठमाडौं ल्याउन बल प्रयोग हुनसक्छ–मन्त्री पोखरेल

हेल्थ टुडे,
काठमाडौं, २९ असारः शिक्षामन्त्री गिरिराजमणि पोखरेलले आमरण अनसनरत डा. गोविन्द केसीको स्वास्थ्य कमजोर भए बल प्रयोग गरेर भएपनि काठमाडौं ल्याइने बताउनु भएको छ । उहाँले त्यसबेला बल प्रयोग भयो भनेर नलेख्नु आग्रह गर्नुभयो ।
डा. केसी १४ दिनदेखि जुम्लामा आमरण अनसनरत हुनुहुन्छ । डा केसीले आफु काठमाडौं नआउने अडान लिनुका साथै सरकारले केन्द्रबाट पठाएको डाक्टरहरुबाट पनि उपचार लिनुभएको छैन । यता सरकारका तर्फबाट शुक्रबार फेरि अर्को टोली पठाउने तयारी गरिएको शिक्षामन्त्री पोखरेलले जानकारी दिनुभयो ।
मन्त्री पोखरेलले मेडिकल एशोसिएनको टोलीलाई जुम्ला जान आग्रह गर्दा नमानेको भन्दै दुःख समेत व्यक्त गर्नुभयो । शिक्षा पत्रकारिता पुरस्कार २०७४ वितरण कार्यक्रममा पोखरेलले, सरकारले आग्रह गरेपछि देखाउन पनि जानुपर्छ तर, उहाँहरु नमान्नु भएको र स्वास्थ्यसंस्था बन्द गर्न लाग्नु भएको दुखद भएको बताउनुभयो ।
सरकार वार्ता विरोधी नभएको तर, स्वास्थ्य अवस्था कमजोर भएकासँग सम्वाद नहुने बताउदै पहिलो प्राथमिकता उपचार भएकाले, उहाँका स्वास्थ्य सुचांककहरु कमजोर भएर गयो भने जबरजस्ती पनि गर्नुपर्ने चेतावनी दिनुभयो ।
त्यस्तो बेला मौसमले साथ दियो भने बलपूर्वक डा. केसीलाई काठमाडौं ल्याउने संकेत गर्दै उहाँले सञ्चारकर्मीहरुलाई सरकारले बल प्रयोग गर्यो भनेर नलेख्न आग्रह गनुभएको छ ।
मन्त्री पोखरेलले डा गोविन्द केसीका मागका सम्बन्धमा संसद्मा दर्ता भएको चिकित्सा शिक्षा विधेयकमा उल्लेखित चिकित्सा आयोगबाट सम्बोधन गरिने भएकाले उहाँलाई काठमाडौँमा ल्याएर वार्ता गर्ने तयारी भइरहेको समेत जानकारी गराउनुभयो ।