तेडियो अनशन–दोषीलाई कारवाही नभए पूनःअनशन बस्ने चेतावनी

काठमाडौँ, ३० असारः वीर अस्पतालमा आमरण अनशनमा बस्नुभएका गंगामाया अधिकारी अनशन तोड्नुभएको छ ।
राष्ट्रिय मानव अधिकार आयोगका अध्यक्ष अनुपराज शर्माले कानून, न्याय तथा संसदीय मामिलामन्त्री शेरबहादुर तामाङको उपस्थितिमा जुस खुवाएर अधिकारीलाई अनशन तोडाउनुभएको हो ।
जुस खाएपछि अधिकारीले आफू १० दिनका लागिमात्र अनशन तोडेको बताउनुभयो । छोराको हत्या गर्ने दोषीलाई अहिले समातिएको बताउदै उहाँले, अब कारबाही हुन्छ कि हँुदैन, १० दिनसम्म दोषीलाई सरकारले के गर्दछ हेर्ने र यदि कारबाही नगरे फेरि ११औँ दिनमा अनशनमा बस्ने चेतावनी दिनुभयो । उहाँले अहिलेको अनशन तोडेको नभई स्थगितमात्र गरेको बताउनुभएको छ ।
सो अवसरमा मन्त्री तामाङले अनशन तोडाउँदा गंगामायालाई कहिल्यै अनशन बस्न नपर्ने गरी न्याय दिलाउने बताउनुभयो । सरकार अन्यायमा परेकालाई न्याय दिलाउने गर्दछ भन्नुहुदै उहाँले गंगामायालाई न्याय दिलाउनका लागि नै अदालत प्रक्रिया थालिएकोले न्याय नपाउने हो कि भनेर शंका नगर्न आग्रह गनुभयो ।
गंगामायालाई न्याय दिने सम्बन्धमा सरकार र मानव अधिकार सम्मलित समिति बनाइनेसमेत मन्त्री तामाङले बताउनुभयो ।
आयोगका अध्यक्ष शर्माले अधिकारीलाई न्याय दिलाउने बाटोमा आयोग लाग्ने बताउँदै अहिले घटनामा संलग्नलाई प्रहरीले नियन्त्रणमा लिएको छ, अब दोषीलाई कारबाही हुने प्रक्रियामा रहेको बताउनुभयो । उहाँले यदि सरकारले दोषीलाई कारबाही गर्न केही नगरे आफुहरु साथमै रहेको स्पष्ट पार्नुभयो ।
गोर्खा फुजेलकी ५८ वर्षीया अधिकारी गत जेठ १५ गतेदेखि छोरा कृष्णप्रसाद अधिकारीको हत्यामा संलग्नलाई कारबाहीको माग गर्दै वीर अस्पतालमा आमरण अनशन बस्नुभएको थियो । गत आइतबार उहाँका छोराको हत्याका आरोपित छविलाल पौडेल सर्वोच्च अदालतमा पुगेर आत्मसमर्पण गरेपछि अधिकारीलाई अनशन तोडाउने प्रयास गरिएको थियो ।
छोरा कृष्णप्रसादको हत्यारालाई कारबाहीको माग गर्दै अधिकारीको श्रीमान् नन्दप्रसाद अधिकारीको अनशनकै क्रममा विस २०७१ असोज ६ गते निधन भएको थियो । विसं २०६१ जेठ १४ गते छोरा कृष्णप्रसाद अधिकारीलाई मामाघर चितवन गएको बेला हत्या भएको थियो ।
रासस