हेल्थ टुडे,
पोखरा,२४ फागुनः गण्डकी मेडिकल कलेजका पूर्व प्रमुख कार्यकारी अधिकृत (सीईओ) सन्तोष खनाल र कर्मचारी लक्ष्मणप्रसाद शर्मामाथि बिहीबार प्रहरीले ठगी मुद्दा दर्ता गरेको छ । अनाधिकृत रुपमा शुल्क उठाएको भन्दै विद्यार्थीले उजुरी दिएपछि उनीहरुलाई प्रहरीले बुधबार पक्राउ गरेको थियो ।
विद्यार्थीको उजुरीपछि बुधबारै कलेजका अध्यक्ष खुमा अर्याल, प्रिन्सिपल रवीन्द्र श्रेष्ठ, लेखा प्रमुख युवराज शर्मा, लेखाकी हरिमाया पौडेल, प्रशासनका दिनेश पौडेल, पूर्व प्रमुख कार्यकारी अधिकृत सन्तोष खनाल, कलेजका कर्मचारीहरु तिलक पौडेल, लक्ष्मणप्रसाद शर्मा, कृष्ण पौडेल र कृष्ण घिमिरेलाई पक्राउ पुर्जी जारी गरेको थियो । तर, पक्राउ पुर्जी जारी गरिएका मध्ये ८ जना फरार भएका छन् । प्रहरीले फरार ८ जनाको खोजी भइरहेको जनाएको छ ।
सरकारले काठमाडौंबाहिर ४२ लाख ४५ हजार र भित्र ३८ लाख ५० हजार शुल्क तोके पनि कलेजले १५ लाख रुपैयाँसम्म अतिरिक्त शुल्क लिएको भन्दै कलेजका विद्यार्थीहरु आन्दोलनमा छन् । विद्यार्थीले अतिरिक्त शुल्क उठाए पनि त्यसको बिल, चौचर नदिएको र कलेजका शिक्षकले व्यक्तिगत खातामा पैसा जम्मा गर्न लगाएको आरोप लगाएका छन् ।
विद्यार्थीहरुले सरकारले तोकेकै शुल्कमा पढ्न पाउनुपर्ने, अतिरिक्त तिरेको शुल्कको बिल, भौचर पाउनुपर्ने लगायत माग राख्दै माघ १६ गतेदेखि विद्यार्थी आन्दोलन गरिरहेका छन् ।
Leave a Reply