हेल्थ टुडे,
काठमाडौ,२ बैशाखः
कर्मचारी समायोजनको विरोध गर्दै आन्दोलनमा उत्रिएका सरकारी चिकित्सकहरु काममा फर्किएका छन् । सरकारले चिकित्सकहरुका माग पूरा गर्न १५ दिनको समय मागेपछि आन्दोलनरत चिकित्सकहरु बैशाख १५ गतेसम्मको लागि आन्दोलन स्थगित गरेर काममा फर्किएका हुन् । स्वास्थ्य तथा जनसंख्या मन्त्रालयमा शनिबार साँझ सरकार र आन्दोलनरत पक्षबीच भएको वार्तामा सरकारले वैशाख १५ गतेसम्मको समय माग गरेको थियो ।
आन्दोलनरत केहि चिकित्सकहरुले सरकारबाट विगतमा जस्तै धोका हुनसक्ने भन्दै उधारो सम्झौता नगर्ने अडान लिए पनि लगातारको बन्दका कारण धेरै बिरामीले उपचार सेवा नपाएको, बिरामीलाई मार्कामा परेकाले केहिदिनको लागि आन्दोलन स्थगित गरी काममा फर्किने निर्णय लिइएको सरकारी चिकित्सकहरुले जनाएका छन् ।
दुईपक्षबीच भएको छलफलमा डाक्टरको माग बमोजिम नै पुल दरबन्दीका विषयलाई कानुनी रुपमा नै सम्बोधन गर्न सरकार सकारात्मक रहेको दुवैपक्षले जनाएका छन् । मन्त्रालयका प्रतिनिधिले कानुनी रूपमा यो विषयलाई टुंग्याउनुपर्ने भएकाले केही दिनको समय माग गरेकोले आफुहरु केहि दिन समय दिन राजी भएको सरकारी चिकित्सक संघ(गोदान) ले जनाएको छ ।
सरकारी चिकित्सकहरुले आफूहरुलाई संघ माताहत राखेर आवश्यकता अनुसार देशका जुनसुकै कुनामा रहेका स्वास्थ्य संस्थामा खटाउन माग गरेका छन्। सरकारी डाक्टरले एक सातादेखि अस्पतालमा आकस्मिक बाहेकका सेवा बहिष्कार गरेका थिए । उनीहरुले अस्पताल परिसर बाहिर टेन्टबाट भने उपचारका लागि आएका बिरामीलाई सेवा दिँदै आएका थिए ।
सरकारसंग भएको सहमतिपछि आइतबार बसेको गोदान केन्द्रीय समितिको बैठकले १५ दिनसम्मका लागि आन्दोलन स्थगित गरी काममा फर्किने निर्णय गरेको थियो । आन्दोलनस्थगितको निर्णयसंगै सम्पूर्ण सरकारी चिकित्सकहरु पूर्ववत् काममा फर्किएका छन् । तर,सरकारी चिकित्सकहरुले १५ दिनभित्र पनि माग पूरा नभए थप कडा आन्दोलनको चेतावनी दिएका छन् ।
Leave a Reply