हेल्थ टुडे,
वीरगञ्ज,११ बैशाखः वीरगञ्जमा एक २० वर्षीया महिलाले एकै पटक चारजना शिशु जन्माएकी छन् । पर्साको छिपहरमाइ गाउँपालिका–४ जयमंगलापुरका सलीम गद्धीकी श्रीमती २० वर्षीया नजमा खातुनले ३ छोरी र १ छोरा गरी चारजना शिशुलाई जन्म दिएकी हुन्। वीरगन्ज हेल्थ केयर हस्पिटलमा मंगलबार दिउँसो १२ बजेर ४० मिनेटमा खातुनले ४ शिशु जन्माएकी हुन्। खातुनले जन्माएका चारैजना शीशुको स्वास्थ्य अवस्था सामान्य रहेको अस्पतालले जनाएको छ ।
उपचारमा संलग्न चिकित्सकले दिएको जानकारी अनुसार खातुनले जन्म दिएका तीन छोरीको तौल क्रमश १ किलो ५ सय ग्राम, १ किलो र ८ सय ग्राम तथा छोराको तौल १ किलो २ सय ५० ग्राम रहेको छ । चारैजना शिशुको अवस्था सामान्य रहेपनि तौल कम भएकाले सबैलाई अस्पतालको एनआइसीयु कक्षमा राखिएको अस्पतालकी मेट्रोन भूमिका अधिकारीले जानकारी दिएकी छन् ।
सुत्केरी व्यथा लागेपछि खातुनलाई वीरगञ्ज लगायत सिमा नजिकै भारतका अस्पतालमा लगेपनि अस्पतालहरुले बिरामी भर्ना गर्न नमानेपछि खातुनका श्रीमान सलीमले वीरगन्ज हेल्थ केयर अस्पतालमा मंगलबार बिहान सात बजे भर्ना गरिएको जनाएका छन् ।
सामान्यता गर्भ रहेको ९ महिनामा शिशु जन्मिने गरेको भएपनि खातुनले सात महिना पनि नपुग्दै शिशु जन्मिएकाले उनीहरुको तौल कम रहेको अस्पतालको प्रसूति विभागकी चिकित्सक डा.स्वेता चौधरीले जानकारी दिइन् । डाक्टर चौधरीका अनुसार आमा खातुनको स्वास्थ्य अवस्था सामान्य रहेको छ ।
Leave a Reply