जनशक्ति अभावले भरतपुर अस्पतालको आइसियू सेवा प्रभावित

हेल्थ टुडे,
चितवन,१५ कात्तिकः जनशक्ति अभावले भरतपुर अस्पतालको आइसियू सेवा एक महिनादेखि बन्द भएको छ । २० बेडको आइसियू रहे पनि हाल १० बेड मात्र सञ्चालनमा रहेका अस्पताल प्रशासनले जनाएको छ । सरसफाइको बहाना बनाएर दसैँअघि नै अस्पतालले १० बेड आइसियू सञ्चालन बन्द गरेको थियो ।

आवश्यक डाक्टर र नर्स नहुँदा सबै आइसियू सेवा सुचारु गर्न नसकिएको अस्पतालले जनाएको छ । जनशक्ति अभावले उपचार सेवा दिन नसकेपछि अस्पतालले गम्भीर अवस्थाका कतिपय बिरामीलाई पनि साधारण बेडमै राखेर उपचार गराइरहेको छ  भने कतिपयलाई रिफर गरेर अन्य अस्पताल पठाउने गरेको छ ।

तर,अस्पतालका एक चिकित्सकले आइसियू बन्द गर्नुको अर्को कारण नियमित सरसफाइसमेत रहेको दावी गरे । तर, पूर्ण सरसफाइका लागि आइसियू कक्ष ३ दिन बन्द गरे पुग्छ । भएको जनशक्ति कोही पढ्न जाने, कोही व्यावहारिक कारणले छाड्ने गर्दा आइसियू बन्द हुनुको मुख्य कारण भएको अस्पतालले जनाएको छ ।

अस्पतालका आइसियू इन्चार्ज डा. प्रकाश खतिवडाले भने बिरामीको चाप कम भएकाले बन्द हुँदा खासै प्रभाव नपरेको दावी गरे । अति संवेदनशील मानिने आइसियू कक्षमा हरेक बेडका बिरामीको नियमित निगरानी राख्नुपर्ने हुन्छ ।

तर, यस्तो कामका लागि जम्मा दुईजना नर्स परिचालित छन् । उनीहरूले नै सबै बिरामीको हेरचाह गरिरहेका छन् । कर्मचारी व्यवस्थापन र सरसफाइ दुवै कारणले आइसियू बन्द भएकोले पुनः सञ्चालनका लागि छलफल भइरहेको अस्पताल प्रशासनले जनाएको छ ।