डा.सन्दुक रुइतलाई दुई लाख रासीको सम्मान

हेल्थ टुडे,
काडमाडौं, ८ पुस: प्रख्यात नेत्र रोग विशेषज्ञ डा. सन्दुक रुइतलाई दुई लाख रासीको हेमबहादुर मल्ल सम्मान प्रदान गरिने भएको छ । नेपाल जनप्रशासन संघ र साल्ट टेडिङ कर्पोरेसनको संयुक्त साझेदारीमा स्थापना गरिएको २०७४ का लागि हेम बहादुर मल्ल सम्मान डा. रुइतलाई प्रदान गर्ने निर्णय भएको हो । सूचना आयोगका प्रमुख आयुक्त कुष्णहरि बास्कोटाको संयोजकत्वमा गठित पाँच सदस्यिय निर्णायक मण्डलले सम्मानको अन्तिम फैसला गरेको हो । स्वर्गिय हेमबहादुर मल्लले साल्ट टेडिङ कर्पोरेसनलाई अहिलेको अवस्थासम्म ल्याउन र आयोडिनयुक्त नुनको प्रयोग दर बढाउन उल्लेखनिय योगदान गरेकाले उनको नामबाट यो सम्मान हरेक वर्ष एक जना विशिष्ठ योगदान गर्ने व्यक्तिलाई प्रदान गरिदै आएको छ ।
२०६० सालदेखि प्रदान गरिदै आएको यो सम्मान २०६२ सालमा मुटु सल्यचिकित्सक डा. भगवान कोइरालाले पाएका थिए । त्यसैगरि यो सम्मान पूर्व उपकुलपति डा. केदारभक्त माथेमा, डा. सुरेशराज शर्मा, पूर्व सभामुख दमननाथ ढुंगाना, पूर्व प्रधानन्यायधिक खिलराज रेग्मी लगायतले प्राप्त गरेका छन । त्यसैगरि २०७३ सालको हेमबहादुर सम्मान विद्युत प्रधिकरणका प्रमुख कार्यकारी कुलमान घिसिङलाई प्रदान गरिने भएको छ । दुवै जनालाई पुस ११ गते राजधानीमा आयोजना हुने कार्यक्रममा सम्मान गरिने छनौट समितिका संयोजक बास्कोटाले जानकारी दिए । डा. रुइतले अहिलेसम्म एक लाख ३० हजारलाई आखाको ज्योति प्रदान गरेका छन् । उनी हाल तिलगंगा आखा प्रतिष्ठानका प्रमुख कार्यकारी हुन ।