ओम्नी समूहसँग स्वास्थ्य सामाग्री खरिदबारे लेखा समितिले स्वास्थ्यमा थाल्यो छानबिन

हेल्थ टुडे,
काठमाडौं, १४ बैसाख : स्वास्थ्य तथा जनसंख्या मन्त्रालय मातहतको स्वास्थ्य सेवा विभागले कोरोना भाइरसको उपचारका लागि विवादास्पद ओम्नी समूहसँग स्वास्थ्य सामाग्री खरिद गर्दा भएको अनियमिताका बिषयमा प्रतिनिधिसभाको सार्वजनिक लेखा समितिले छानविन सुरु गरेको छ । कोरोना भाइरसको उपचारका लागि करिव एक अर्ब २४ करोड बराबरको स्वास्थ्य सामग्री किन्न विभागले ओम्नी विजनेश कर्पोरेट इन्टरनेशनलसँग गत महिना खरिद सम्झौता गरेको थियो । बजार मूल्य भन्दा कयौं गुना बढी महंगोमा समान किन्न खोजेर आर्थिक अनियमितता गरेको सर्वत्र विरोध भएको थियो ।
ओम्नीले पहिलो लट सामान ल्याएपछि चर्को विरोध सामना गर्न नसकेपछि स्वास्थ्य सेवा विभागले उक्त सम्झौता रद्द गरेको घोषणा गरेको थियो । विना प्रतिस्पर्धा महंगो मूल्यमा खरिद गरेको भनेर प्रश्न उठेपछि सरकारले हतारहतार सम्झौता रद्द गरेको थियो । ओम्नीले पहिलो लटमा समेत कमसल सामग्री ल्याएको र विश्व स्वास्थ्य संगठनले मान्यता नदिएका र्यापिट किट्स ल्याएको भन्दै सर्वत्र विरोध भए पछि सरकारले स्वास्थ्य सामग्री किन्ने जिल्ला नेपाली सेनालाई दिएको थियो ।
स्वास्थ्य सेवा विभागले किनेको सामग्रीका बिषयमा छानविन गर्न आवश्यक देखिएको छानविन सुरु गर्ने लेखा समितिको ठहर छ । समितिले यसका लागि खरिद प्रक्रियामा भएको सबै कागजपत्र सात दिनभित्र उपलब्ध गराउन स्वास्थ्य तथा जनसंख्या मन्त्रालयलाई पत्र काटेको छ । समितिले सामग्री किन्दा अपनाउनु पर्ने विधि प्रकृयाका बिषय, सम्झौताका विभिन्न दफाहरु, बजार मूल्य लगायत अन्तराष्टिय मान्यताहरुको समेत अध्ययन गरेर दोषी देखिए कारवाहीका लागि सरकारलाई सिफारिस गर्ने छ । अख्यियारले यस बिषयमा छानविन गर्ने भनेको भएपनि अहिलेसम्म कुनै छानविन हुन सकेको छैन ।