कोरोना संकटमा सघाउन सेभ द चिल्ड्रेनद्वारा सरकारलाई साडे १७ सय पीपीई हस्तान्तरण

हेल्थ टुडे,
काठमाडौँ, २१ बैसाख : कोरोना भाइरसको रोकथाम र उपचारमा सहयोग पुर्याउने उद्देश्यले सेभ द चिल्ड्रेनले स्वास्थ्य तथा जनसंख्या मन्त्रालयलाई १ हजार ७ सय ४३ सेट व्यक्तिगत सुरक्षा कवच (पीपीई) हस्तान्तरण गरेको छ । यसका साथै सेभ द चिल्ड्रेनलले अन्य स्वास्थ्य सामग्री पनिप्रदान गरेको छ ।
आइतबार मन्त्रालयमा स्वास्थ्य मन्त्री भानुभक्त ढकालको उपस्थितिमा ती स्वास्थ्य सामग्री हस्तान्तरण गरिएको मन्त्रालयका प्रवक्ता डा. विकास देवकोटाले बताए ।
सामग्री हस्तान्तरण कार्यक्रममा बोल्दै स्वास्थ्य तथा जनसंख्या मन्त्री ढकालले सरकारलाई प्राप्त सामग्रीले स्वास्थ्य सेवा सुदृढीकरण गर्न र स्वास्थ्यकर्मीहरुलाई कोरोना भाइरसको संक्रमणबाट बच्न र बचाउन सहयोग गर्ने बताए । सेभ द चिल्ड्रेनबाट प्राप्त पीपीई आवश्यकता अनुसार स्वास्थ्य सेवा विभाग र प्रदेशहरुमा पठाइने प्रवक्ता डा. देवकोटाले जानकारी दिए ।
बालबाकालिकासहित जोखिममा रहेका व्यक्तिहरुलाई स्वास्थ्य सेवा सुनिश्चित गराउने र सरकारलाई संकटको बेला सहयोग गर्ने उद्देश्य अनुसार स्वास्थ्य सामग्री हस्तान्तरण गरिएको सेभ द चिल्ड्रेन नेपालका राष्ट्रिय निर्देशक बन्दना रिसालले बताइन । व्यक्तिगत सुरक्षा कवच (पीपीई) सेट विश्व स्वास्थ्य संगठन र नेपाल सरकारले तोकेको मापदण्ड अनुसारका रहेको सेभ द चिल्ड्रेनले जारी गरेको प्रेश विज्ञप्तिमा उल्लेख गरिएको छ ।