हेल्थ टुडे,
काठमाडौँ, ३१ बैसाख : राष्ट्रिय महिला आयोगले कोरोना भाइरस संक्रमितहरुलाई राख्न बनाइएका क्वारेन्टाइन तथा आइसोलेसनहरु महिलामैत्री बनाउन स्थानीय तहहरुलाई निर्देशन दिएको छ ।
गृह मन्त्रालय तथा संघीय मामिला तथा सामान्य प्रशासन मन्त्रालयमार्फत देशभरिका ७ सय ५३ वटै स्थानीय तहमा पत्राचार गरेर क्वारेन्टाइन तथा आइसोलेसनहरु महिलामैत्री बनाउन निर्देशन गरिएको आयोगकी अध्यक्ष कमलाकुमारी पराजुलीले जानकारी दिइन । उनले भनिन, ‘विगतमा क्वारेन्टाइनमै महिलाहरु हिंसाको सिकार भएको, असुरक्षा महसुस गरेको घटनाहरु आएको हुँदा फेरि दोहोरिन नदिन मैत्रीपट्ठर्ण बनाउन निर्देशन पठाएका हौं,’ ।
निषेधाज्ञामा लैङ्गिक हिंसाका घटनालाई गम्भीर रुपमा लिन र महिला, बालिका, जेष्ठ नागरिक, अपांगता भएका व्यक्तिहरु तथा लैंगिक तथा यौनिक अल्पसंख्यकहरुलाई राहत, उद्धारमा प्राथमिकता सरोकारवालालाई ध्यानाकर्षण गराएको छ । लैङ्गिक हिंसामा परेका महिला तथा बालबालिकाको तत्काल उद्धार, राहत, औषधोपचार लगायतका विषयमा सरोकारवाला निकायसँग समन्वय गर्न आयोगले ‘उच्चस्तरीय लैङ्गिक हिंसा रोकथाम तथा नियन्त्रणसम्बन्धी अनुगमन तथा समन्वय समिति’ गठन गरेको छ ।
लामो समयदेखि रिक्त पदमा कार्यभार सम्हालेका पदाधिकारीहरुले सय दिनमा गरेका गतिविधिहरुबारे जानकारी दिँदै अध्यक्ष पराजुलीले कोरोना महामारीमा आयोगले आफ्नो कार्यक्षेत्रमा संवेदनशील भएको बताइन् ।
यसैगरी आयोगले विज्ञहरुमार्फत रोजगारीका अवसरमा महिलाहरूको पहुँच र महिलामैत्री वातावरणबारे अध्ययन, मुलुकी देवानी संहिता २०७४ तथा मुलुकी अपराध संहिता २०७४ कार्यान्वयनपश्चात् महिला अधिकारको प्रचलनमा आएको परिवर्तनसम्बन्धी अध्ययन र संघीय मन्त्रालयबाट महिला सशक्तीकरण एवं लैङ्गिक मूलप्रवाहीकरण सम्बन्धमा भए गरेका कार्यक्रमहरूको विश्लेषणात्मक अध्ययन गरिरहेको छ ।
Leave a Reply