पदमराज जोशी,
काठमाडौं, ९ मंसिर : नेपाली कांग्रेसको १४ औं महाअधिवेशनमा नेपाल चिकित्सक संघका ४ जना पूर्व अध्यक्षहरु महाअधिवेशन प्रतिनिधिमा निर्वाचित भएका छन् । नेपाल चिकित्सक संघका पूर्व अध्यक्षहरु डा. चोपलाल भुसाल, डा. केदारनरसिंह केसी, डा. अञ्जनीकुमार झा र डा. मुक्तीराम श्रेष्ठ नेपाली कांग्रेसको महाअधिवेशन प्रतिनिधिमा निर्वाचित भएका छन् ।
डा. भुसाल र डा. श्रेष्ठ अर्घाखाचीबाट निर्वाचित भएका छन् भने डा. झा महोत्तरीबाट र डा. केसी नुवाकोटबाट महाअधिवेशन प्रतिनिधि निर्वाचित भएका हुन् । नेपाल स्वास्थ्य अनुसन्धान परिषद्का पूर्व अध्यक्ष समेत रहेका डा. भुसाल बांगालादेशका लागि पूर्व नेपाली राजदूत समेत हुन । त्यसैगरि डा. झा नेपाल स्वास्थ्य अनुसन्धान परिषद्का अध्यक्ष र नेपाली कांग्रेसको सूचना तथा सञ्चार समितिका समेत सदस्य हुन । डा. केसी क्षयरोग केन्द्रका पूर्व निर्देशक हुन । चार जना डाक्टर पालैपालो चिकित्सक संघको अध्यक्ष निर्वाचित भएका थिए । डा. भुसालपछि क्रमशं केसी, झा र श्रेष्ठ चिकित्सक संघको अध्यक्ष भएका थिए ।
नेपाल चिकित्सक संघ देश भरिका चिकित्सकहरुको छाता संगठन हो । संघमा १० हजार भन्दा बढी चिकित्सक सदस्य छन् । महाअधिवेशनमा निर्वाचित भएका संघका चार पूर्व अध्यक्ष मध्ये दुई जना नेपाली कांग्रेसको केन्द्रिय सदस्यका आकांक्षी हुन । नेपाली कांग्रेसको १४ औं महाधिवेशन यही मंसिर २४ देखि २६ सम्म काठमाडौंमा हुदै छ ।
