पदमराज जोशी,
काठमाडौं, ९ साउन : वीर अस्पतालमा भिआईपी र भिभिआईपीका लागि थप सुविधा र शैया सहित कक्ष सञ्चालन सुरु गर्ने कार्यक्रम थियो मंगलबार । वीरको पुरानो भवनमा २ र नयाँ सर्जिकल भवनमा ३ शैया थप गरेर कुल ५ शैयाको भिआईपी र भिभिआईपी कक्ष सञ्चालन सुरु गर्नु भन्दा पहिले त्यसको निरिक्षण गर्न विहान साडे १० बजे पुगेका थिए स्वास्थ्य तथा जनसंख्या मन्त्री मोहनबहादुर बस्नेत । वीरले ७ वर्ष पहिलेदेखि नै भिआईपीका लागि छुट्टै स्पेसल कक्ष सञ्चालन गरेको थियो । जति सुविधा थपेर कक्ष सञ्चालन गरे पनि भिआईपी र भिभिआईपी उपचारका लागि विदेश जाने प्रवृति नरोकिएपछि वीर अस्पतालको नेतृत्वले पनि त्यसलाई ठूलो महत्व दिएको थिएन ।
स्वास्थ्य मन्त्री बस्नेतले सरकारी खर्चमा उपचार गर्न चाहने भिआईपी र भिभिआईपीका लागि वीर अस्पतालमै थप सुविधा र कक्ष थप गरेर तयारी अवस्थामा राख्न निर्देशन दिए पछि वीरले नयाँ सजिर्कल भवनमा ३ शैया थप गरेको थियो । निरिक्षणका क्रममा मन्त्री बस्नेत पहिले पुरानो भवनको दोश्रो तलमा पुगे । जहाँ पहिलेदेखि नै भिआईपी र भिभिआईपीका लागि शैया छुट्याइएको थियो । मन्त्री बस्नेत आउने थाहा पाएपछि वीर अस्पतालका निर्देशक र चिकित्सा विज्ञान राष्टिय प्रतिष्ठान (न्याम्स) का उपकुलपति, रेक्टर, रजिस्टार सहित स्वागतका लागि तयार थिए । मन्त्री बस्नेतले पुरानो भवनमा रहेका कक्ष निरिक्षण गर्न खाजे । न्याम्स उपकुलपति प्रा.डा.भुपेन्द्र बस्नेतले एउँटा कक्षको जानकारी दिए पछि अर्को भिभिआईपी कक्षको ढोका खोले । त्यो कक्षमा राखिएको बेड होस वा त्यहाँको दराज सबै फरक थिए । छेउमै खाना पकाउने छुट्टै कोठा छ । आगन्तुकका लागि प्रतिक्षा स्थल सबै सुविधा छ । डा.बस्नेतले स्वास्थ्य मन्त्रीलाई भने, विसं २०४४ सालदेखि कुनै पनि विरामी यो बेडमा भर्ना भएको छैन । स्वर्गिय राजा विरेन्द्र विरामी हुदा यहाँ भर्ना भएका थिए । वीरका एक जना पुराना कर्मचारीका अनुसार त्यति बेला राजा विरेन्द्रसँगै रानी ऐश्वर्य शाह पनि संगै बसेकी थिइन । उक्त कक्षमा रहेको बेडको साइडमा रहेको दराजमा चावी लगाइएको छ । त्यसको चावी कसैसँग पनि छैन ।
ती कर्मचारीले भने, यो दराजमा सुन र चादीका भाडाकुडा हुनसक्छन । तर भित्र के छ कसैलाई थाहा छैन । राजपरिवारले उपचारका लागि प्रयोग गर्ने उक्त कक्ष पछि वीर अस्पतालले भिआईपी र भिभिआईपीका लागि छुट्याएको थियो । तर अस्पतालमै भर्ना भएर उपचार गर्न अहिलेका कुनै पनि नेता वीर गएनन् । नेपालमै उपचार हुने रोगको उपचारका लागि विदेश जाने गरेका छन् । न्याम्सका उपकुलपति डा. बस्नेतका अनुसार ओपीडी सेवा लिन भने पूर्व राष्टपति रामबरण यादव, पूर्व प्रधानमन्त्री बाबुराम भट्टराई, पूर्व प्रधानमन्त्री माधव नेपाल लगायतका नेता पुगेका छन् । तर भर्ना नै भएर उपचार गराउन आएका छैनन् । राज्य कोषबाट ठूलो धनरासी खर्च गरेर विदेश उपचार गराउने नेताहरुको प्रवृति प्रति जनता र नेपाली चिकित्सक कोही पनि खुशी छैनन् । नेपालमा संभव हुने उपचारका लागि विदेश जान नपरोस भन्ने उद्देश्यका साथ वीरमा रहेको भिआईपी र भिभिआईपी कक्षलाई थप सुविधा सम्पन्न र थप शैया थप गरेर सेवा सञ्चालन गर्न निर्देशन दिएको स्वास्थ्य मन्त्री बस्नेत बताउछन् ।
वीरको त्यो बेड, जहाँ २०४४ सालदेखि कुनै विरामी भर्ना भएको छैन
![वीरको त्यो बेड, जहाँ २०४४ सालदेखि कुनै विरामी भर्ना भएको छैन](http://healthtodaynepal.com/wp-content/uploads/2023/07/aa-bir-356991022_1496212254448774_1256306121734757515_n-940x597.jpg)
Leave a Reply