सुर्तीजन्य पदार्थ विरुद्वको अभियानमा सक्रिय व्यक्ती र संस्था गरि ६ जना पुरस्कृत

हेल्थ टुडे,
काठमाडौं, १८ जेठ : सुर्तीजन्य पदार्थ विरुद्वको अभियानमा सक्रिय व्यक्ती र संस्था गरि ६ जनालाई स्वास्थ्य मन्त्री ब्लुम्बर्ग जनस्वास्थ्य पुरस्कार प्रदान गरिएको छ । विश्व सुर्तीजन्य पदार्थ रहित दिवसको अवसरमा शुक्रबार राजधानीमा स्वास्थ्य तथा जनसंख्या मन्त्रालयले आयोजना गरिएको विशेष समारोहमा स्वास्थ्य तथा जनसंख्या राज्यमन्त्री हसिना खानले पुरस्कृतहरुलाई सम्मान पत्र प्रदान गरेकी थिइन भने स्वास्थ्य सचिव डा. रोसन पोखरेलले दोसल्ला ओढाएका थिए ।
रु. ५० हजार रासी रहेको उक्त पुरस्कार प्राप्त गर्नेहरुमा वरिष्ठ स्वास्थ्य पत्रकार एवं नेपाल हेल्थ प्रेस डट कमका प्रधान सम्पादक अतुल मिश्र, स्वास्थ्य खवर पत्रिकाका पत्रकार धनबहादुर खड्का र नेपाल टेलिभिजनकी कार्यक्रम प्रस्तोता नीता सापकोटा रहेका छन् । त्यसैगरि हेल्थ नेपाल प्रालिका अध्यक्ष समेत रहेका स्वास्थ्य पत्रकार भिषा काफ्ले, गण्डकी प्रदेश स्वास्थ्य मन्त्रालयका सचिव डा विनोदविन्दु शर्मा र स्वास्थ्य शिक्षा सूचना तथा सञ्चार केन्द्रका पुर्व निर्देशक सुनील शर्मा रहेका छन् । कार्यक्रममा स्वास्थ्य तथा जनसंख्या मन्त्रालयका सचिव डा. रोसन पोखरेलले सुर्तीजन्य पदार्थको सेवन न्युनिकरण गर्न सूचना भएर मात्र नपुग्ने बताउदै व्यवहारमा उतार्न सके मात्र सुर्तीजन्य पदार्थ विरुद्वको अभियान सफल हुने बताए ।
स्वास्थ्य तथा जनसंख्या राज्यमन्त्री हसिना खानले सरकारले सुर्तीजन्य पदार्थ विरुद्व कडा कानून ल्याएको भए पनि कार्यन्वयन नहुदा समस्या देखिएको बताइन । कार्यक्रममा स्वास्थ्य सुचना तथा सञ्चार केन्द्रका वरिष्ठ स्वास्थ्य शिक्षा प्रशिक्षक डा. भक्तबहादुर केसीले सुर्तीजन्य पदार्थ सेवनका कारण नेपाल बर्षेनी ३९ हजार जनाको मृत्यु हुने गरेको तथ्यांक प्रस्तुत गर्दै सुर्तीजन्य पदार्थको लतबाट बालबालिकालाई जोगाउनु पर्ने आवश्यकतामाथि जोड दिए । स्वास्थ्य शिक्षा सूचना तथा सञ्चार केन्द्रका निर्देशक केशवराज पंडितले पछिल्लान दिनमा ई सिगरेटप्रति युवा जमात लोभिन थालेको पाइएको बताउदै त्यसलाई पनि कानूनले बन्देज गरेको दावी गरे । हरेक वर्ष मे ३१ को दिन विश्व सुर्तीजन्य पदार्थ रहित दिवस मनाइने गरिन्छ ।