वरिष्ठ स्वास्थ्य पत्रकार अतुल मिश्रलाई स्वास्थ्यमन्त्री ब्लुम्बर्ग जनस्वास्थ्य पुरस्कार

हेल्थ टुडे,
काठमाडौं, १८ जेठ : वरिष्ठ स्वास्थ्य पत्रकार अतुल मिश्र स्वास्थ्य मन्त्री ब्लुम्बर्ग जनस्वास्थ्य पुरस्कारबाट पुरस्कृत भएका छन् । विश्व सुर्तीजन्य पदार्थ रहित दिवसको अवसरमा शुक्रबार राजधानीमा आयोजना गरिएको विशेष समारोहमा स्वास्थ्य तथा जनसंख्या राज्यमन्त्री हसिना खानले पत्रकार मिश्रलाई सम्मान पत्र प्रदान गरेकी थिइन भने स्वास्थ्य सचिव डा.रोसन पोखरेलले दोसल्ला ओढाएका थिए । उक्त पुरस्कारको रासी रु. ५० हजार रहेको छ । २७ वर्षसम्म कान्तिपुर दैनिकमा स्वास्थ्य पत्रकारिता गरेका वरिष्ठ पत्रकार मिश्र हाल नेपाल हेल्थ प्रेस डट कमको प्रधान सम्पादन छन् । पत्रकारिताका माध्यमबाट सुर्तीजन्य पदार्थको सेवन न्यूनिकरण गर्न र सुर्तीजन्य पदार्थ सम्बन्धी ऐन नियमको प्रभावकारी कार्यन्वयमा पत्रकार मिश्रले उल्लेखनीय योगदान गरेको मूल्यांक गर्दै उक्त पुरस्कार प्रदान गरिएको स्वास्थ्य तथा जनसंख्या मन्त्रालय, स्वास्थ्य करकोषको कार्यालयले जनाएको छ ।
पत्रकार मिश्रसँगै सुर्तीजन्य पदार्थ बिरुद्धको अभियानमा उत्कृष्ठ कार्य गर्ने अन्य ५ जना व्यक्ति र संस्थालाई समेत स्वास्थ्य मन्त्री ब्लूम्बर्ग जनस्वास्थ्य पुरस्कार प्रदान गरिएको छ । पुरस्कृत हुनेहरुमा संस्थागत तर्फ हेल्थ नेपाल प्रालिका अध्यक्ष स्वास्थ्य पत्रकार भिषा काफ्ले, व्यक्तिगत तर्फ स्वास्थ्य पत्रकार धनबहादुर खड्का, कार्यक्रम प्रस्तोता नीता सापकोटा रहेका छन् । कानून कार्यन्वयन तर्फ गण्डकी प्रदेश स्वास्थ्य मन्त्रालयका सचिव डा विनोदविन्दु शर्मा र स्वास्थ्य शिक्षा सूचना तथा सञ्चार केन्द्रका पुर्व निर्देशक सुनील शर्मा रहेका छन् । पुरस्कारको रासी जनही ५० हजार र कदर पत्र रहेको छ ।
कार्यक्रममा स्वास्थ्य तथा जनसंख्या मन्त्रालयका सचिव डा. रोसन पोखरेलले सुर्तीजन्य पदार्थको सेवन न्युनिकरण गर्न सूचना भएर मात्र नपुग्ने बताउदै व्यवहारमा उतार्न सके मात्र सुर्तीजन्य पदार्थ विरुद्वको अभियान सफल हुने बताए । स्वास्थ्य तथा जनसंख्या राज्यमन्त्री हसिना खानले सरकारले सुर्तीजन्य पदार्थ विरुद्व कडा कानून ल्याएको भए पनि कार्यन्वयन नहुदा समस्या देखिएको बताइन ।
कार्यक्रममा स्वास्थ्य सुचना तथा सञ्चार केन्द्रका वरिष्ठ स्वास्थ्य शिक्षा प्रशिक्षक डा. भक्तबहादुर केसीले सुर्तीजन्य पदार्थ सेवनका कारण नेपाल बर्षेनी ३९ हजार जनाको मृत्यु हुने गरेको तथ्यांक प्रस्तुत गर्दै सुर्तीजन्य पदार्थको लतबाट बालबालिकालाई जोगाउनु पर्ने आवश्यकतामाथि जोड दिए । स्वास्थ्य शिक्षा सूचना तथा सञ्चार केन्द्रका निर्देशक केशवराज पंडितले पछिल्लान दिनमा ई सिगरेटप्रति युवा जमात लोभिन थालेको पाइएको बताउदै त्यसलाई पनि कानूनले बन्देज गरेको दावी गरे ।