हेल्थ टुडे,
काठमाडौं,१३ जेठ : सुर्तीजन्य पदार्थ नियन्त्रण र निगमनका क्षेत्रमा कार्यरत संस्था एक्सन नेपालले सुर्तीजन्य पदार्थमा उच्च दरले कर बढाउनु पर्ने माग गरेको छ । एक्सन नेपालले सरकार समक्ष आगामी आर्थिक वर्ष २०८३÷०८४ को बजेटमार्फत सुर्तीजन्य पदार्थमा उच्च दरले कर वृद्धि गर्नु पर्ने गर्न माग गरेको हो । एक्सन नेपालले बुधबार विज्ञप्ति जारी गर्दै नेपालमा सुर्तीजन्य पदार्थको प्रयोगले जनस्वास्थ्य र अर्थतन्त्रमा गम्भीर असर पारिरहेको उल्लेख गर्दै यसको नियन्त्रणका लागि भारी मात्रामा कर वृद्धि गर्न माग गरेको जनाएको छ ।
स्वास्थ्य तथा जनसंख्या मन्त्रालयका अनुसार नेपालमा हाल सुर्तीजन्य पदार्थमा ३३.३ प्रतिशत मात्रै कर लाग्दै आएको छ, जबकि विश्व स्वास्थ्य संगठन (डब्लुएचओ) ले खुद्रा मूल्यको कम्तीमा ७५ प्रतिशत कर लगाउन सिफारिस गरेको छ ।
डब्लुएचओको तथ्यांकअनुसार नेपालमा हरेक वर्ष सुर्तीजन्य पदार्थसँग सम्बन्धित रोगका कारण ३९ हजारभन्दा बढी व्यक्तिको मृत्यु हुने गरेको छ । मन्त्रालयले सुर्ती सेवनका कारण देशलाई वार्षिक करिब ४५ अर्ब रुपैयाँ आर्थिक भार पर्ने जनाएको छ ।
एक्सन नेपालले किशोर तथा युवामा समेत सुर्तीजन्य पदार्थको प्रयोग बढ्दो रहेको उल्लेख गर्दै चुरोटको मूल्य १० प्रतिशतले बढाउँदा यसको उपभोग उल्लेख्य रूपमा घट्न सक्ने डब्लुएचओको अध्ययन उद्धृत गरेको छ ।
संस्थाले बिडी, चुरोट, सिगार, खैनी, गुट्खा तथा पान मसालामा लाग्ने स्वास्थ्य जोखिम कर र अन्तःशुल्क कम्तीमा ५० प्रतिशतले वृद्धि गर्न सुझाव दिएको छ ।
Leave a Reply