क्लिनिकल प्याथोलोजिस्टहरुको छाता संगठन ‘एसोसिएसन अफ क्लिनिकल प्याथोलोजिस्ट्स अफ नेपाल’ एसिपिएनको अध्यक्षमा वरिष्ठ प्याथोलोजिस्ट डा.शैलेस प्रधान निर्वाचित भएका छन् । डा. प्रधान काठमाडौं मेडिकल कलेज प्याथालोजी विभागका प्रमुख र नेपाल चिकित्सक संघका केन्द्रिय सदस्य हुन् ।
राजधानीमा शनिबार सम्पन्न भएको एसिपिएनको नवौं राष्ट्रिय अधिवेशनले डा.प्रधानको अध्यक्षतामा ११ सदस्यिय नयाँ कार्यसमिति चयन गरेको हो । एसोसिएसनको उपाध्यक्षमा डा. रुना झा, महासचिवमा डा. सुजन शर्मा, सहसचिवमा डा. राकेश पाठक र कोषाध्यक्षमा डा. करिष्मा मल्ल चुनिएका छन् । त्यसैगरि कार्यसमितिको सदस्यहरुमा डा. विदुर वस्ती, डा. निहारिका शाह, डा. रोजन घिमिरे, डा. श्रीया श्रीवास्तव, डा. रेखा मानन्धर र डा. सुमिदा तिवारी रहेका छन् । नव निर्वाचित कार्यसमितिका पदाधिकारीलाई एसिपिएनका संस्थापक डा. हरिगोविन्द श्रेष्ठले अबिर र माला गलाईदिएर सम्मान गरेका थिए ।
निर्वाचित कार्यसमितिको सम्मानमा केमिकल एण्ड मेडिकल सर्जिकल इक्युप्मेन्ट सप्लायर्सको संस्था केम्सानले शनिबार गरेको सम्मान कार्यक्रममा एसिपिएनका निवर्तमान अध्यक्ष डा. गोपी अर्यालले नयाँ कार्यसमितिलाई आफ्नो पूर्ण साथ रहने जनाउदै अंकोलोजिस्ट र रेडियोलोजिस्टबिच समुन्यय गरि अगाडि बढ्न सुझाउ दिए । केम्सनका अध्यक्ष भक्त हमालले नेपाल आयात भइरहेका केमिकल र सर्जिकल उपकरणको गुणस्तर मापन र दर्ता गर्ने कानून नभएकाले समस्या देखिने गरेको बताउदै सरकारले तत्काल नीति बनाएर लागु गर्नु पर्ने माग गरे । संस्थाका संस्थापक डा. हरिगोविन्द श्रेष्ठले प्याथोलोजीले जनताको स्वास्थ्य उपचारसंग प्रत्यक्ष सरोकार राख्ने भएका यसको विकासले जनताले गुणस्तरीय उपचार पाउने बताए ।
एसिपिएनका नव निर्वाचित अध्यक्ष डा. प्रधानले आफ्नो कार्यकालमा सबैपक्षलाई मिलाएर अगाडि बढ्ने दृढता व्यक्त गरे । सन् १९९० मा स्थापना भएको एसिपिएनमा देशभरिका दुई सयभन्दा बढी प्याथालोजिस्ट सदस्य छन् ।
Leave a Reply