डा केसीको माग पूरा गर्न आग्रह

काठमाडौँ, ५ साउनः विभिन्न पेशाकर्मी, चिकित्सक, विद्यार्थी र सर्वसाधारणले चिकित्सा शिक्षासम्बन्धी माथेमा आयोगको प्रतिवेदनअनुसारको चिकित्सा शिक्षा विधेयक ल्याई अनशनरत डा गोविन्द केसीको माग पूरा गर्न आग्रह गरेका छन् ।
डा केसी समर्थकहरुद्वारा आज आयोजित दबाब मूलक प्रदर्शनमा पूर्वप्रधानन्यायाधीश सुशीला कार्कीले डा केसीले उठाएका विषय सम्पूर्ण नेपालीका भएकाले छिटोभन्दा छिटो उहाँको माग पूरा गर्नुपर्ने बताउनुभयो ।
अधिकारकर्मी कृष्ण पहाडीले सरकारले जतिसक्दो छिटो माग सम्बोधन गरी समस्या समाधान गर्नुपर्ने बताउनुभयो ।
अधिवक्ता ओमप्रकाश अर्यालले डा गोविन्द केसीको जीवनरक्षाको माग गर्दै आइतबार सामूहिक अनशन बस्ने जानकारी दिनुभयो ।
सो अवसरमा पूर्वप्रधानमन्त्री डा बाबुराम भट्टराई, पूर्वस्वास्थ्यमन्त्री गगन थापा, लेखक खगेन्द्र संग्रौला, अभिनेत्री मनिषा कोइरालालगायत उपस्थित हुनुहुन्थ्यो ।
रासस