वार्ताको माध्यमबाट माग सम्बोधन हुन्छ–मन्त्री पण्डित

काठमाडौँ, ५ साउनः संघीय मामिला तथा सामान्य प्रशासनमन्त्री लालबाबु पण्डितले अनशनरत डा गोविन्द केसीका माग सरकारले वार्ताको माध्यमबाट सम्बोधन गर्न तयार रहेको बताउनुभएको छ ।
काठमाडौंमा आज आयोजित कार्यक्रममा उहाँले संसदमा प्रस्तुत भएको चिकित्सा शिक्षा विधेयक कुनै पनि हालतमा फिर्ता हुन नहुने भन्दै वार्ताबाट डा केसीको जायज माग समाधान गर्न सरकार तयार रहेको बताउनुभयो ।
उहाँले अहिलेसम्म अनशनबाट मात्रै कुनै पनि समस्या समाधान नभएको भन्दै डा केसीका मागबारे पनि वार्ता र सहमति खोज्नुपर्ने बताउनुभयो । संसदमा प्रस्तुत भएको विधेयक संशोधन मार्फत पारित हुनसक्ने, तर बीच बाटोबाटै फिर्ता लिने काम नहुने बताउदै त्यो सम्भव नभएको बताउनुभयो । संसद्मा दर्ता भएका विधेयक संसद्बाट नै पास हुने तर फिर्ता नहुने स्पष्ट पार्नुभयो ।
मन्त्री पण्डितले मुलुकलाई समृद्ध बनाउन सरकारले निजी, सहकारी र सरकारीलाई लिएर अघि बढ्ने भन्दै आफूहरु कुनैपनि क्षेत्रलाई निरुत्साहित गर्ने पक्षमा नरहेको बताउनुभयो । नेपालमा मेडिकल शिक्षा अध्ययन गर्न नेपाली विद्यार्थी नपाएको उल्लेख गर्दै उहाँले नेपालमा मेडिकल कलेज खोल्नै हुँदैन भन्ने पक्षमा आफुहरु नभएको, मेडिकल कलेजका शुल्क निर्धारण गराँै, मेडिकल कलेज खोल्नै हुँदैन भनेर निषेध गर्ने कुरामा हाम्रो समर्थन हुँदैन भन्नुभयो ।
रासस