अवैध रुपमा सञ्चालन गरी प्रतिबन्धित औषधि बिक्री गर्ने आयुर्वेद औषधि पसलमा शिलबन्दी

हेल्थ टुडे,
नेपालगञ्ज,३२ जेठः अवैध रुपमा सञ्चालन गरेको भन्दै नेपालगन्जको एक आयुर्वेद औषधि पसलमा शिलबन्दी गरिएको छ। अनुगमनका क्रममा नेपालगन्ज–१० सुर्खेतरोडमा रहेको अष्टाङ आयुर्वेद पसललाई शिलबन्दी गरिएको हो। दर्ता नगरी सञ्चालनमा रहेको सो औषधि पसलले प्रतिबन्धित औषधि बिक्री गरेको र भ्रमात्मक प्रचारप्रसार गरेको पर्चा टोलीले फेला पारेको औषधि व्यवस्था कार्यालय, नेपालगन्जले जनाएको छ ।

यस्तै, अनुगमन टोलीले नेपालगन्जको चितवन एग्रोभेट, हरिओम मेडिकल, उपकार मेडिकल हल र कुलाइसा मेडिकल हलको पनि अनुगमन गरेको थियो। सो एग्रोभेटले दर्ता नभएको औषधि बिक्री गरेको, म्याद नाघेको औषधि पसलमा राखेको, भेटेनरी औषधि पसल भए पनि कृषिको बीउबिजन, तथा कीटनाशक जस्ता विषादी राखेको पाइएकाले विभाागीय कारबाहीका लागि औषधि व्यवस्था कार्यालयमा बोलाइएको जनाईएको छ ।