कोरियाले नेपालमा नेसनल हेल्थ इन्सुरेन्स सपोर्ट प्रोजेक्ट सञ्चालन गर्ने

हेल्थ टुडे,
काठमाडौ,१० कात्तिकः स्वास्थ्य बीमा कार्यक्रमलाई प्रभावकारी बनाउन दक्षिण कोरियाले नेपालमा नेसनल हेल्थ इन्सुरेन्स सपोर्ट प्रोजेक्ट सञ्चालन गर्ने भएको छ। नेपालमा २०७२ सालबाट स्वास्थ्य बीमा कार्यक्रम सुरू भएको थियो । त्यसमा दक्षिण कोरिया अन्तर्राष्ट्रिय सहयोग निकाय (कोइका) ले सन् २०१३ सालदेखि  सहयोग गर्दै आएको थियो।

अब, सन् २०१९ अक्टोबरदेखि भने नेपालको स्वास्थ्य बीमा कार्यक्रमलाई सघाउन कोइका र नेसनल हेल्थ इन्सुरेन्स प्रोग्राम (एनएचआइएस), कोरियाले संयुक्त रूपमा नेसनल हेल्थ इन्सुरेन्स सपोर्ट प्रोजेक्ट सञ्चालन गर्ने भएको हो ।

नेपालमा स्वास्थ्य बीमा कार्यक्रम सुरू भएको चार वर्ष बितिसकेको छ। तर, त्यसको प्रभावकारी कार्यान्वयन भने हुन सकेको छैन। सरकार तथा बोर्डले चालू आर्थिक वर्षभरिमा सबै जिल्लामा स्वास्थ्य बीमा कार्यक्रम पुर्‍याउने बताएको भएपनि हालसम्म ४९ वटा जिल्लामा मात्र कार्यक्रम सुरू भएको छ ।

दक्षिण कोरियाको उक्त प्रोजेक्ट अन्तर्गत कोरियाका कर्मचारी नेपालमै बसेर नेपालको स्वास्थ्य बीमा कार्यक्रमलाई सहयोग गर्ने जनायएको छ । उनीहरूले नेपालमा लागू भएको स्वास्थ्य बीमा कार्यक्रमलाई थप प्रभावकारी बनाउन नीतिगत सुधार, कार्यक्रममा सहभागिको क्षमता वृद्धि र नेपालको स्वास्थ्य बीमाको प्रभावकारिताको विषयमा अध्ययन गर्ने तथा त्यसमा जनसहभागिता वृद्धिको कार्यकम सञ्चालन गर्ने उक्त परियोजनाले जनाएको छ । परियोजना सन् २०२० को डिसेम्बरसम्म चल्ने जनाइएको छ ।