चिकित्सकको अभावले जिल्ला अस्पताल बैतडीको सेवा प्रवाह प्रभावित

हेल्थ टुडे,
बैतडी,११ कात्तिकः
जिल्ला अस्पताल बैतडीमा चिकित्सक नहुँदा अस्पतालले दिने सेवा प्रभाव प्रभावित भएको छ । प्रदेश सरकार मातहतको अस्पतालमा तीन जना स्थायी चिकित्सकको दरबन्दी रहे पनि अहिले एक जना चिकित्सकको भरमा अस्पताल सञ्चालन भईरहेको छ । दुई जना छात्रवृत्ति करारका चिकित्सकहरुले सेवा दिइरहेका छन् ।
एक नवौँ तह र दुई जना आठौँ तहका चिकित्सकको दरबन्दी रहेको अस्पतालमा आठौँ तहका एक जना मात्रै कार्यरत छन् । आठौँ तहका चिकित्सक जगदीशचन्द्र बिष्टले अस्पताल प्रमुखको जिम्मेवारीसमेत सम्हालिरहेका छन् । उनी पनि संघमा समायोजन भएकाले पदस्थापन हुने बित्तिकै अस्पताल छोड्नुपर्ने हुन्छ ।

अहिले पनि छात्रवृत्ति करारका चिकित्सकबाट सेवा सञ्चालन भइरहेको छ । जिल्ला अस्पतालमा शल्यक्रिया गरेर महिलाको बच्चा जन्माउने जटिल प्रसूति सेवा पनि सञ्चालनमा छ । सो सेवा निरन्तरताका लागि स्त्रीरोग विशेषज्ञ आवश्यक पर्छ । डाक्टर बिष्टको सरुवा भएमा प्रसुति सेवा पनि बन्द हुने अस्पतालले जनाएको छ ।

जिल्ला अस्पतालमा विभिन्न प्रकारका बिरामी आउने भए पनि जनशक्तिको अभावमा सेवा दिन समस्या भएको छ ।