हेल्थ टुडे,
काठमाडौ,१६ कात्तिकः बालबालिकामा विद्यमान कुपोषण र गरिबीविरुद्धको राष्ट्रिय अभियान शुक्रबारदेखि सुरु भएको छ । राष्ट्रपति भवन शितल निवाशमा आयोजना गरिएको समारोहमा राष्ट्रपति विद्यादेवी भण्डारीले सुरु गरेकी हुन् । उद्घाटन समारोहलाई सम्बोधन गर्दै राष्ट्रपति भण्डारीले कुपोषणविरुद्ध सहयोगका लागि प्रदेश सरकार र स्थानीय तहलाई आग्रह गरिन्। संविधानले प्रत्येक बालबालिकालाई शिक्षा, स्वास्थ्य, पोषणको अधिकार दिएको स्मरण गर्दै राष्ट्रपति भण्डारीले बालबालिकाको सर्वांगिण विकासका लागि सुपोषित हुनु आवश्यक रहेको बताइन्।
अभियानलाई अगाडि बढाउन गैरनाफामूलक बलियो नेपाल नामक संस्था स्थापना गरिएको छ। राष्ट्रिय योजना आयोगका पूर्व उपाध्यक्ष डा. स्वर्णिम वाग्ले अध्यक्ष रहेको बलियो नेपालको बोर्डमा नेपाल उद्योग परिसंघका उपाध्यक्ष निर्वाण चौधरी, क्रिकेटर पारस खड्का, नविल बैंकका सीईओ अनिल शाह र पोषणविद् डा.उमा कोइराला छन्।
बलियो नेपालका अध्यक्ष डा.वाग्लेले अभियानको सुरूवात ६ महिनादेखि २३ महिनासम्मका बालबालिकामा देखिने कुपोषणको जोखिम न्यून गर्ने बताए। यसका लागि निजी क्षेत्रसँगको सहकार्यमा पोषणयुक्त लिटो र अण्डा कुपोषित बालबालिकाको पहुँचमा पुर्याउने गरी कार्यक्रम तय भएको उनले बताए।
चौधरी ग्रुप एवं चौधरी फाउन्डेसनका अध्यक्ष विनोद चौधरीको विशेष पहलमा यो अभियान नेपालमा कार्यान्वयनमा आएको हो। पहिलो चरणमा यो अभियान प्रदेश ५ मा लागू गरिएको छ। प्रदेश ५ का मुख्यमन्त्री शंकर पोखरेलले यस अभियानका लागि आफ्नो प्रदेश छानिएकोमा खुसी व्यक्त गरे ।
Leave a Reply