हेल्थ टुडे,
काठमाडौं, २ असार : समलिङ्गी विवाहलाई कानूनी मान्यता प्रदान गर्नका लागि दबाब दिन नेपाल परिवार नियोजन संघले ‘विवाहमा समानताको अधिकार’ नामक परियोजना सुरु गरेको छ । आईपिपिएफको सहयोग र निल हिरा समाजको सहकार्यमा यो परियोजना अगाडि बढाइएको हो ।
बुधबार राजधानीमा आयोजित कार्यक्रममा नेपाल परिवार नियोजन संघका महानिर्देशक डा.नरेशप्रताप केसीले परियोजना सुभारम्भ भएको जानकारी दिदै यो परियोजनाले यौनिक तथा अल्पसंख्यकको वैवाहिक समानताको अधिकार स्थापित गर्नमा अहं भूमिका खेल्ने बताए । यौनिक तथा अल्पसंख्यकको अधिकार स्थापना गर्न परिवार नियोजन संघले बिगत लामो समयदेखि पैरवी गर्दै आएको बताउँदै महानिर्देशक केसीले भविश्यमा पनि यो प्रसास निरन्तर रहने बताए । उनले भने, ‘कुनै पनि व्यक्तिले आफ्नो स्वअनुभूति अनुसारको लैङ्गिक पहिचान हासिल गर्न उसको वैयक्तिक आत्मनिर्णयको अधिकार भएकाले विवाहमा समानताको अधिकार स्थापित हुनु पर्छ । ’
महिला र पुरुषबिच हुने विवाहलाई मात्र नेपालमा कानूनी मान्यता प्रदान गरेको बताउँदै अब समलिंगी विवाहले पनि मान्यता पाउनु पर्नेमा डा. केसीले जोड दिए । निल हिरा समाजकी कार्यकारी निर्देशक मनिषा ढकालले महिला र पुरुष बाहेक अन्य लिंगी व्यक्तिहरुको यौन अधिकारलाई पनि सरकारले समान हैसियत दिनु पर्ने बताइन । कार्यक्रममा निल हिरा समाजकी भूमिका श्रेष्ठ, परिवार नियोजन संघकी कार्यक्रम निर्देशक डा. बिना श्रेष्ठ, युएन एड्सकी डा. किसु रावल लगायतका विज्ञहरुले सरकारले समलिंगी विवाहलाई कानुनी मान्यता प्रदान गर्नु पर्नेमा जोड दिएका थिए ।
परिवार नियोजन संघ पैरवी साखा प्रमुख जमुना सिटौलाले क्यानाडा, बेलायत, स्पेन,फ्रान्स, निदरल्याण्ड लगायतका थुप्रै देशले विवाहमा समानताको अधिकार प्रदान गरेको जानकारी गराउदै नेपाल सरकारले समलिंगी विवाहले कानुनी मान्यता दिनु पर्नेमा जोड दिइन । कार्यक्रममा विवाहमा समानताको अधिकारका लागि पैरवी गर्न निर्माण गरिएका ३ वटा डकुमेन्ट्ररी समेत प्रदर्शन गरिएको थियो ।
Leave a Reply