कुष्ठरोग सम्बन्धी विभेदकारी कानून संसदले चाडै हटाइने छ : पाण्डे

हेल्थ टुडे,
काठमाडौं, २७ फागुन : नेपाली कांग्रेसका सह–महामन्त्री एवं सांसद बद्री पाण्डेले कुष्ठरोग सम्बन्धी विद्यमान विभेदकारी कानून संसदले चाडै हटाइने बताएका छन् । २५ औं अन्तर्राष्ट्रिय आत्मसम्मान तथा आदर दिवसको अवसरमा शनिबार एशोसिएसन फर आईडिया नेपालले राजधानीमा आयोजना गरेको सम्मान कार्यक्रममा सह–महामन्त्री पाण्डेले देवानी संहितामा कुष्ठरोग सम्बन्धी केही कानूनी व्यवस्था संविधानको मर्म बिपरित रहेकोले तिनलाई चाडै संसोधन गरेर हटाइने बताएका हुन । कुनै महिला वा पुरुषलाई विवाह गरेपछि कुष्ठरोग लागेमा उसले सम्बन्ध विच्छेद गर्न पाउने विद्यमान कानूनी व्यवस्थाले कुष्ठरोगीलाई विभेद गरेको भन्दै उक्त कानूनी व्यवस्था हटाउनु पर्ने माग सरोकारवालाले गर्दै आइरहेका छन् । पाण्डेले कुनै पनि व्यक्तिलाई कुनै पनि बहानामा विभेद गर्न नपाइने संबैधानिक व्यवस्था विपरित भएका अन्य कानून परिमार्जन गर्न संसदमा आफू पनि लाग्ने र अरु सांसदहरुलाई सहमत गराउने दावी गरे । उनले भने, ‘ कुष्ठरोग सम्बन्धी विद्यमान विभेदकारी कानून फाल्ने छौ । यसमा ढुक्क भए हुन्छ । ’ उनले आत्मसम्मान दिवसलाई संयुक्त राष्ट्रसंघ र राज्यले समेत आधिकारिक रुपमा दिवसका रुपमा मनाउनु पर्ने आवश्यकता औल्याए ।
ल्याप्रोसी मिसन नेपालका कन्ट्री डाइरेक्टर शोभाकर कँडेलले कुष्ठरोग स्वास्थ्यको समस्या मात्र नभएर समाजिक समस्या पनि भएकोले राज्यले विभेदकारी कानून हटाउनु पर्ने आवश्यकता रहेको बताए । उनले अहिले पनि कुष्ठरोगी प्रति विभेदकारी कानून विद्यमान रहेकाले संसदले त्यस्ता कानून परिमार्जन गर्नु पर्नेमा जोड दिए ।
आईडिया नेपालका अध्यक्ष अमर तिमल्सिनाले कुनै पनि व्यक्तिले विना भेदभाव समाजमा जिवनयापन गर्न पाउनु पर्नेमा जोड दिदै राज्यले विभेदकारी कानून हटाउनु पर्ने बताए ।
कार्यक्रममा कुष्ठरोगको उपचार र प्रभावितको हक अधिकारका क्षेत्रका उल्लेखनिय कार्य गरेकोमा वरिष्ठ छाला रोग विज्ञ डा. रविन्द्र बास्कोटा, सुनकोशी गाउँपालिका सिन्धुपाल्चोकका बलराम नेउपाने, समाजसेवी पिमा घर्तिमगर, श्रीलंकाका रे, भारतका रामवराही शाह लगायतलाई सम्मानित गरिएको थियो । कार्यक्रम एशोसिएसन फर आईडिया नेपालका अध्यक्ष दिनेश न्यौपानेको अध्यक्षतामा भएको थियो ।
यसअघि बसुन्धराबाट निस्केको र्यालीले आत्मसम्मान पूर्वक बाच्न पाउनु पर्ने नारा सहितका प्लेकार्ड बोकेर सभाहलमा परिणत भएको थियो ।