एनएमए र डब्लूएचओको अगुवाईमा ‘स्वास्थ्य पत्रकारिताको पाठ्यक्रम’ तयार, स्वास्थ्यमन्त्रीले गरे अनुमोदन

हेल्थ टुडे,
काठमाडौं, २४ असार : नेपाल चिकित्सक संघ (एनएमए) र विश्व स्वास्थ्य संगठन (डब्लूएचओ) को सहकार्यमा नेपाल पत्रकार महासंघ, प्रेस काउन्सिल र स्वास्थ्यपत्रकारहरुको सहभागितामा स्वास्थ्य पत्रकारिता सम्बन्धी पाठ्यक्रम तयार गरिएको छ ।
राजधानीमा आईतबार आयोजित एक कार्यक्रममा नमुना पाठ्यक्रमलाई स्वास्थ्यमन्त्री मोहनबहादुर बस्नेतले सरोकारवालाहरुको उपस्थितिमा अनुमोदन गरेका हुन ।
स्वास्थ्यमन्त्री बस्नेतको उपस्थतिमिा गरिएको अनुमोदन कार्यक्रममा नेपाल प्रेस काउन्सिल, नेपाल पत्रकार महासंघ, वरिष्ठ स्वास्थ्य पत्रकारहरु, नेपाल मेडिकल काउन्सिल, नेपाल नर्सिङ काउन्सिल, नेपाल स्वास्थ्य व्यवसायी परिषद्, विश्व स्वास्थ्य संगठन, अफिन लगायत सरोकारवालहरुका प्रतिनिधि सहभागि थिए । नमुना पाठ्यक्रम अनुमोदन हुनु अगाडि पाठ्यक्रम तयार गर्न विज्ञहरु सम्मिलित टेक्निकल वर्किङ कमिटि बनाइएको थियो । बेलायतका रहेका जर्नल अफ मेडिकल एसोसिएसनका सम्पादक डा. एन्जल मगरको संयोजकत्वमा गठित कमिटिका वरिष्ठ स्वास्थ्य पत्रकारहरुका अलावा चिकित्सा शिक्षा र जनस्वास्थ्यका अधिकारी रहेका थिए । दुई दिनको कार्यशाला पछि समिटिले पाठ्यक्रमलाई अन्तिम रुप दिएको थियो ।
कार्यशालाको समापन कार्यक्रममा बोल्दै मन्त्री बस्नेतले पाठ्यक्रमको विकासले स्वास्थ्य पत्रकारिताको क्षेत्रमा सत्य तथ्य समाचार सम्प्रेषण गर्न योगदान पुग्ने बताए । उनले कसैले पनि सबै कुरा बुझेको हुँदैन, सिक्दै जानिने हो भन्दै मेडिकल सम्बन्धी ज्ञान लिएर समाचार सम्प्रेषण गर्दा बढी विश्वासिलो र मर्यादित हुने तर्क गरे ।
यसैगरी चिकित्सा विज्ञान र स्वास्थ्य सेवाका क्षेत्रमा आवश्यक प्राविधिक तथा षियगत जानकारीलाई पाठकसमक्ष पु¥याउन प्रशिक्षण कार्यक्रम सञ्चालन गर्न लागिएको संघका अध्यक्ष डा. अनलिवक्रिम कार्कीले जानकारी दिए।
कमिटिका संयोजक डा. एन्जल मगरको मेडिकल जर्नालिज्ममा देखिएको कमजोरीलाई कम गर्न स्वास्थ्य पत्रकारहरुलाई तालिम प्रदान गर्न पाठ्यक्रम फलदायी हुने विश्वास व्यक्त गरे । एमएमएले बिगत १० वर्ष देखि नै स्वास्थ्इ पत्रकारहरुका लागि तालिम दिनका लागि पाठ्यक्रम तयार पारेर प्रशिक्षण गर्ने योजना बनाए पनि पूर्ण हुन नसकेको बताउदै विश्व स्वास्थ्य संगठन र स्वास्थ्य पत्रकारहरुको सहभागिताले यो अभियान अव सफल हुने विश्वास व्यक्त गरे ।
पाठ्यक्रममा विकास गरी प्रशिक्षण कार्यक्रम सञ्चालन गर्न २०१६ देखि प्रयास गरिएको र हाल आएर बल्ल पूरा भएको बताउदै ३ महिनाभित्र स्वास्थ्य पत्रकारीता गरिरहेका तथा गर्न चाहनेहरुकालागि तालिम दिइने उनले बताए।
कार्यक्रमका संयोजक नेपाल चिकित्सक संघका पूर्व अध्यक्ष डा. लोचन कार्कीले स्वास्थ्यको समाचार लेख्दा सही सूचना सही व्यक्तिबाट लिन नसक्दा पनि समाचारले गलत सन्देश दिने गरेको बताए। यसलाई रोक्ने उद्देश्यले पाठ्यक्रम बनाइएको यसले स्वास्थ्यकर्मी तथा स्वास्थ्य पत्रकार दुबैलाई फाइदा पुग्ने विश्वास गरे। एनएमएले यही पाठ्यक्रमका आधारमा स्वास्थ्य पत्रकार र पत्रकार महासंघको सहकार्यका स्वास्थ्य पत्रकारिता तालिम सञ्चालनमा सहजिकरण गर्न चाहेको जनाएको छ ।