ट्रमा सेन्टरमा अत्याधुनिक उपकरण सहित फिजियो थेरापी सेवा बिस्तार

हेल्थ टुडे,
काठमाडौं, १५ साउन : राष्ट्रिय ट्रमा सेन्टरले अत्याधुनिक उपकरण सहित फिजियोथेरापी सेवा बिस्तार गरेको छ । १० शैयाको फिजियोथेरापी विभागमा सिपिएम (कन्टिनियोस पेसिभ मोसन) र बिएफआर (ब्लड फ्लो रेस्ट्रिक्सन) लगायतका अत्याधुनिक उपकरण थप गरेर फिजियोथेरापी सेवा विस्तार गरिएको फिजियोथेरापी विभाग प्रमुख फिजियोथेरापिस्ट प्रविणकुमार यादवले जानकारी दिए ।
यादवका अनुसार विभिन्न कारणले हातको जोर्नी जाम भएमा वा मासु सुक्दै गएको अवस्थामा यी उपकरणको सहायताले फिजियोथेरापी मार्फत सहज रुपमा उपचार गर्न सकिन्छ । यसका साथै घुँडाको सल्यक्रियापछि र काँध वा कुहिनाका जोर्नीहरुको उपचार गर्दा पनि सिपिएम प्रभावकारी रहेको यादवले जानकारी दिए । बिएफआर मार्फत माशुको घनत्वमा सुधार ल्याउन सकिन्छ ।

यादवका अनुसार ट्रमा सेन्टरमा थप गरिएको सिपिएमलाई मोवाइल डिभाइसको माध्यमबाट पनि सञ्चालन गर्न सकिन्छ । यस किसिमको उपकरण ट्रमा सेन्टरले नेपालमै पहिलो पटक सञ्चालनमा ल्याएको यादवको दावी छ । यादवले भने, ‘ यस किसिमको उपकरण निजी र सरकारी कुनै पनि फिजियो थेरापी सेन्टरमा अहिलेसम्म उपलब्ध छैन । नेपालमा पहिलो पटक ट्रमा सेन्टरले सञ्चालनमा ल्याएको छ । ’

फिजियो थेरारी विभागमा अत्याधुनिक थेरापी मेसिन थप गरि सेवा सञ्चालन भएपछि उपचारका लागि दूरदराजबाट ट्रमा सेन्टर आउने गरेका हजारौ विरामीले सर्वसुलव रुपमा फिजियोथेरापी सेवा पाउने राष्ट्रिय ट्रमा सेन्टरका प्रमुख मेडिकल सुपरिटेन्डेन्ट डा.रुद्र मरासिनीले बताए । डा. मरासिनीले भने,‘ विरामीको गुणस्तरीय उपचारका लागि हामीले ट्रमा सेन्टरमा विभिन्न सेवा सुविधा वृद्घि र सेवाको गुणस्तरमा ध्यान दिएका छौ । फिजियोथेरापी सेवा बिस्तारसँगै हालै मात्र अत्याधुनिक मोड्युलर ओटी सञ्चालनमा ल्याएका छौ । ५ वटा ओटी भएकोमा अब ७ वटा ओटी सञ्चालनमा ल्याएका छौ । यसले सहज उपचारमा सहयोग पुग्नेछ ।’ फिजियो थेरापी सेवा बिस्तारका लागि स्वास्थ्य तथा जनसंख्या मन्त्रालयले विनियोजन गरेको करिव ८ं० लाख रुपैयाको लागतका यी फिजियो थेरापी उपकरण खरिद गरिएको हो ।
ट्रमा सेन्टरको फिजियो थेरापी विभागमा दैनिक १०० जनाले फिजियोथेरापी सेवा लिने गरेका छन् । २०० शैया क्षमताको ट्रमा सेन्टरले अदेश भरिका दुर्घटना लगायत गम्भिर प्रकृतिका चोटपटकका बिरामीको उपचार गर्दै आइरहेको छ ।