लागु औषध प्रयोगकर्ता र एचआईभी संक्रमितलाई अपराधिकरण गर्नु भन्दा अवसर दिनु पर्नेमा जोड

हेल्थ टुडे,

काठमाडौं, २ भदौ : लागु औषध प्रयोगकर्ता तथा एचआईभी संक्रमितलाई अपराधीका रूपमा व्यवहार नगरी उनीहरूको उपचार, पुनःस्थापना र सामाजिक पुनःएकीकरणमा राज्यले विशेष ध्यान दिनुपर्नेमा सरोकारवालाले जोड दिएका छन्। रिकभरिङ  नेपालले मंगलबार राजधानीमा आयोजना गरेको ‘लागु औषध तथा एचआईभी राजनीतिक प्रतिबद्धता राष्ट्रिय बहस’ कार्यक्रममा प्रतिनिधिसभाका सांसद, विभिन्न राजनीतिक दलका प्रतिनिधि, स्वास्थ्य तथा खाद्य स्वच्छता मन्त्रालयका अधिकारी तथा सरोकारवाला संस्थाका प्रतिनिधिले लागु औषध प्रयोगकर्ता र एचआईभी संक्रमितमाथि हुने विभेद तथा लाञ्छना अन्त्य गर्न राज्यको नीति र व्यवहार परिवर्तन गर्नुपर्ने बताएका हुन्।

राष्ट्रिय स्वतन्त्र पार्टीकी सांसद भूमिका श्रेष्ठले लागु औषध प्रयोगकर्ता र एचआईभी संक्रमितलाई राज्यले अपराधीसरह व्यवहार गर्दा उनीहरू समाजमा सम्मानपूर्वक बाँच्नबाट वञ्चित भएको बताइन्। विगतमा जे भए पनि अब राज्यले यी समुदायलाई हेर्ने दृष्टिकोण परिवर्तन गर्नुपर्ने उनको भनाइ थियो।

“लागु औषध प्रयोगकर्ता र एचआईभी संक्रमितलाई राज्यले हेर्ने नजर फरक हुनुपर्छ। यो मुद्दा सम्बोधन गर्न संसदमा मेरो उपस्थिति छ। अब यो काम हुन्छ,” सांसद श्रेष्ठले भनिन्।

रास्वपाकै सांसद विश्वराज पोखरेलले लागु औषध प्रयोगको असर प्रयोगकर्तामा मात्र सीमित नरही परिवार र समाजसम्म पुग्ने बताए। उनले समस्या समाधानका लागि दोषारोपणभन्दा सुधारको अवसर दिनुपर्नेमा जोड दिए।

नेकपा एमालेकी सांसद साजिका अन्सारीले लागु औषधसम्बन्धी लामो समयदेखि संसदमा अड्किएका कानुनलाई अघि बढाउन आफूहरू प्रतिबद्ध रहेको बताइन्। राष्ट्रिय प्रजातन्त्र पार्टीकी सांसद आशा लामाले लाञ्छना र घृणाभन्दा माया, सहयोग र पुनःस्थापनामार्फत लागु औषधको लतबाट मुक्त गराउनुपर्ने धारणा राखिन्।

राष्ट्रिय एचआईभी एड्स तथा यौनरोग नियन्त्रण केन्द्रका निर्देशक डा. सर्वेश शर्माले लागु औषध प्रयोगकर्ता तथा एचआईभी संक्रमितमाथि हुने लाञ्छना र विभेद अन्त्य गर्न सरकारको प्रयास मात्र पर्याप्त नहुने बताए। यसका लागि राजनीतिक दल, नागरिक समाज, स्वास्थ्य क्षेत्र र समुदाय सबैको सकारात्मक पहल आवश्यक रहेको उनको भनाइ थियो।

कार्यक्रममा संयुक्त राष्ट्रसंघीय विकास कार्यक्रम (यूएनडीपी) की बिन्दा मगरले राजनीतिक दलका प्रतिनिधि र सरोकारवालाबीच लागु औषध तथा एचआईभीका विविध विषयमा भएको छलफलले नीति निर्माणमा सकारात्मक योगदान पु¥याउने बताइन्।

रिकभरिङ नेपालका कार्यकारी निर्देशक विष्णु फुयाल शर्माले नेपालमा एक लाख ३० हजारभन्दा बढी लागु औषध प्रयोगकर्ता रहेको जानकारी दिँदै यो समस्या समाधानका लागि सरकार, राजनीतिक दल, स्वास्थ्य संस्था, नागरिक समाज र समुदायको साझा प्रयास आवश्यक रहेको बताए।

कार्यक्रमका सहभागीहरूले लागु औषध प्रयोगकर्ता र एचआईभी संक्रमितलाई अपराधीकरण गर्नेभन्दा उपचार, पुनःस्थापना, रोजगारी तथा सामाजिक पुनःएकीकरणका अवसर उपलब्ध गराउने नीति आवश्यक रहेको बताएका थिए।