जादाँजादै स्वास्थ्य सचिव डा.पोखरेलले भने, डा. पुकार र अंग प्रत्यारोपणको काम उत्कृष्ट

हेल्थ टुडे,
काठमाडौं, ११ फागुन : स्वास्थ्य तथा जनसंख्या मन्त्रालयको सचिवबाट सेवा निवृत भएका डा.रोसन पोखरेलले भक्तपुरस्थित शहिद धर्मभक्त राष्ट्रिय प्रत्यारोपण केन्द्र र यसका कार्यकारी निर्देशक समेत रहेका अंग प्रत्यारोपण सर्जन डा.पुकारचन्द्र श्रेष्ठले नेपालको स्वास्थ्य क्षेत्रमा गरेको काम उत्कृष्ट रहेको बताएका छन् । स्वास्थ्य सचिव डा. पोखरेलको विदाईका लागि स्वास्थ्य तथा जनसंख्या मन्त्रालयले आईतबार मन्त्रालयमा आयोजना गरेको विदाई कार्यक्रमलाई सम्बोधन गर्दै डा. पोखरेलले डा. पुकारचन्द्र श्रेष्ठ र प्रत्यारोपण केन्द्रले मिर्गौला र कलेजो प्रत्यारोपण जस्तो जटिल शल्यक्रियामा उत्कृष्ट काम गरेको भन्दै प्रशंसा गरेका हुन । डा. पोखरेलले भने, ‘डा. पुकारमा
काम गर्ने इच्छाशक्ति छ । प्रत्यरोपण केन्द्र राम्रो काम गरेको छ । भविश्यमा पनि अझ राम्रो कामको आशा गरेको छु । ’ प्रत्यारोपण केन्द्रको अध्यक्षका हैसियतले आफुलाई पुर्ण सहयोग गरेकोमा प्रत्यारोपण केन्द्र परिवारलाई डा. पोखरेलले धन्यवाद दिए । प्रत्यारोपण केन्द्रले अहिलेसम्म करिव १४ सय जनाको मिर्गौला प्रत्यारोपण र २५ जनाभन्दा बढीको कलेजो प्रत्यारोपण गरिसकेको छ । विदाई कार्यक्रममा स्वास्थ्य मन्त्री प्रदीप पौडेल, सचिव हरि मैनाली, स्वास्थ्य सेवा विभागका महानिर्देशक डा. विकाश देवकोटा लगायतले उपहार सहित माला लगाएर सचिव डा. पोखरेलको विदाई गरेका थिए । त्यसैगरि शहिद धर्मधक्त राष्ट्रिय प्रत्यारोपण केन्द्रका कार्यकारी निर्देशक डा. पुकारचन्द्र श्रेष्ठको नेतृत्वमा केन्द्रका कर्मचारीहरुले सचिव डा. पोखरेललार्ई मायोको चिनो सहित विदाई भेट गरेको थियो । २३ वर्षको स्वास्थ्य सेवाबाट आजैदेखि डा. पोखरेल सेवा निवृत भएका हुन ।
विसं २०७६ सालमा विशिष्ट श्रेणीमा बढुवा भएका डा. पोखरेल २०७८ साउन ५ गते स्वास्थ्य तथा जनसंख्या मन्त्रालयको सचिव नियुक्त भएका थिए । उनले साडे ३ वर्ष स्वास्थ्य तथा जनसंख्या मन्त्रालयको सचिवको जिम्मेवारी सम्हालेका थिए । सोही अवसरमा स्वास्थ्य तथा जनसंख्या मन्त्रालयका अतिरिक्त सचिव डा. दीपेन्द्ररमण सिंहको पनि विदाई गरिएको थियो । डा. सिंह पनि आजैदेखि सेवा निवृत भएका छन् ।