बिरामीलाई बलात्कारको प्रयास गरेको आरोप लागेका डाक्टर निलम्बित

हेल्थ टुडे,
काठमाडौ,१० मंसिरः उपचार गर्न आएकी बिरामी युवतीमाथि बलात्कारको प्रयास गरेको आरोप लागेका डाक्टर रोहित कुमार झालाई मेडिसिटी अस्पतालले निलम्बन गरेको छ। अस्पतालले आइतबार नै डाक्टर झालाई निलम्बन गरेको अस्पताल प्रशासनले जनाएको छ ।
झाको विषयमा आइतबार अस्पतालमा एक संस्थामार्फत गुनासो आएको र त्यसपछि अस्पतालले निलम्बन गरेको जनाइएको छ । डा.झाले दुई महिना अघिबाट मात्र अस्पतालमा जागिर सुरु गरेका थिए ।
डा. झालाई उपचारका लागि आएकी एक युवतिमाथि बलात्कारको प्रयास गरेको आरोपमा प्रहरीले सोमबार पक्राउ गरेको थियो । महानगरीय प्रहरी परिसर ललितपुरका एसएसपी टेकप्रसाद राईका अनुसार उपचारका लागि आइतबार अस्पताल पुगेकी युवतीले आफूमाथि डाक्टर रोहित कुमार झाले बलात्कार प्रयास गरेको भन्दै सोमबार उजुरी दिएपछि पक्राउ गरिएको हो।
एक प्रतिष्ठित संस्थामा कार्यरत ती युवती नियमित स्वास्थ्य उपचारका लागि अस्पताल पुगेकी थिइन्। प्रहरीले यो विषयमा थप अनुसन्धान भईरहेको जनाएको छ ।