स्वास्थ्य राज्यमन्त्री ए क्लासको ठेकेदार

हेल्थ टुडे
स्वास्थ्य राज्य मन्त्री मोहम्मत मुस्ताक आलम स्वास्थ्य राज्य मन्त्री मात्र होइनन् । उनी ए क्लासको ठेकेदार पनि रहेछन । यो कुरा उनले बुधबार राजधानीमा आयोजित समारोहमा सार्वजनिक गरेका हुन ।
राष्ट्रिय एचआईभी महासंघले आयोजना गरेको शरण क्षेत्री पुरस्कार बितरण कार्यक्रममा प्रमुख अतिथि रहेका राज्य मन्त्री आलमले मन्त्रालयमा मन्त्री पछि आफू दोश्रो स्थानको राज्यमन्त्री भए पनि ठेकेदारमा भने आफु ए क्लासको ठेकेदार भएकाले कम्ति आक्न नहुने बताएका हुन । मधेशी जनअधिकार फोरम लोकतान्त्रिकबाट रौतहटबाट निर्वाचित आलमले सबै अधिकार मन्त्रीसँग भएकाले आफुले चाहेको जति स्वास्थ्यमा काम गर्न नसकेको गुनासो गरेका छन । स्वास्थ्य मन्त्री रामजनम चौधरीलाई दूधको चियासंग तुलना गर्दै उनले भने, ‘मन्त्री दूध हालेको चिया जस्तै हो । राज्यमन्त्री त रातो चिया । रातो चिया मन पराउने कमै हुन्छन ।’
पढाई लेखाईमा कमजोर भएपनि राजनीतिक घरानाको व्यक्ति भएकाले राजनीतिको नसा नसा थाहा भएको दाबी गर्दै आफ्नो हजरबुबाले मातृकाप्रसाद कोइराला र गिरिजाप्रसाद कोइरालाको मन्त्री मण्डलमा मन्त्री हुने सौभाग्य पाए पनि आफुले भने दुभाग्यवस केपी ओलीको सरकारमा राज्यमन्त्री हुनु परेकोमा दुखेसो गरे । उनले भने, ‘ मेरो भाग्यमा कोइराला थिएन । केपी ओली परे भाग्यमा । ’ स्वास्थ्य मन्त्रालयको सचिवबाट शान्तबहादुर श्रेष्ठलाई हटाउन हम्मे हम्मे भएको बताउदे आलमले त्यसपछि बरिष्ठ चिकित्सकहरु बिच को सचिव हुने भन्ने बिषयमा हानथाप हुनु दुर्भाग्य भएको बताए ।
कार्यक्रममा एचआईभी एड्सका क्षेत्रमा योगदान गरेको भन्दै वीर अस्पतालका डा. शुशिल शाक्य र एड्स अधिकारकर्मि राजिव काफ्लेलाई शरण क्षेत्री पुरस्कार प्रदान गरिएको थियो । त्यसैगरि पाँच वटा विकास क्षेत्रबाट एचआईभी र एड्सका क्षेत्रका उत्कृष्ठ कार्य गरेकोमा पुर्वाञ्चलबाट प्रयास महिला समूह इटहरी, मध्यमाञ्चलबाट शक्ति मिलन समाज, काठमाडौ, पश्चिमाञ्चलबाट हाम्रो जिवन प्लस गुल्मी, मध्यपश्चिमाञ्चलबाट जुनकिरी महिला समूह बाके र सुदूरपश्चिमबाट गोदावरी प्लस कैलालीलाई सम्मान गरिएको थियो ।